Mizoramin an la nghak zel

Santosh Trophy-ah group VI-in group stage an la khel zo ve lo a, inkhel dang result a zira final round lut thei Mizoram dinhmun a la chiang thei lo. Nimin khan Punjab-in Himachal Pradesh 5-0 in an sawp a, Manipur-in 5-1 in Jharkhand an sawp ve bawk.

Kumin Santosh Trophy-ah hian final round khel tur team 12 aṭangin team 10 a chiang tawh. Champion lai Kerala, West Bengal, Goa, Meghalaya, Delhi, Maharashtra, Karnataka, Services, Odisha leh Railways te an inpettling tawh.

Hmun ruak la awm hi group VI-a pakhatna tan a ni a, pakhat dang leh hi group II (Mizoram) leh group VI pahnihnaa ti ṭha zawk tan a ni. Group VI hian match khat chauh khelh tur an nei tawh a, Manipur leh Punjab te an inkhel dawn.

Mizoram hi group II-ah an awm a, match nga khelh aṭangin point 12 hmu mah se an goal difference hi 6 chauh a ni. Group VI-ah Manipur leh Punjab te goal difference hi Mizoram aiin a ṭha ve ve a, hemi a nih avang hian Mizoram hi Gift Raikhan-a hote kutah an an innghat.

Aizawl FC coach hlui Gift Raikhan hote hian Punjab laka point an hmuh hrim hrim chuan Punjab-in point hmuh zatah Mizoram an tluk lo ang. Chutihrualin Punjab hi an chak erawh chuan Manipur hi pahnihna an ni thung dawn a, goal difference-ah 11 ngawt an neih avangin Mizoram beiseina ṭa tawp ang.

Manipur leh Punjab te hi January 31, Thawhlehni chawhma dar 10:00 hian Khuman Lampak Main Stadium-ah an inkhel dawn. Mizoram hian nikum Santosh Trophy-ah Khuman Lampak Main Stadium-a mualneitu Manipur an hneh loh avangin an tla tawh a, kuminah erawh group VI inelna thlengtu Manipur kutah Mizoram hmalam hun a awm ta thung.