Girona hnehtu Barca an kal zel

Barcelona-in La Liga-a an hmahruaina an sawh nghet zel a, Inrinni zan khan an mikhualna ramah Girona chu 1-0 in an hneh - table chung berah point rukin hma an hruai fal ta.

Catalan club tan Pedri chuan inkhela goal awmchhun a khung a, hun tawp thlengin Girona lamin a chhanletna tur an nei lo - Barca an chak a, 2018-19 season hnua a vawi khat nana league champion nih an beiseina chu an chhi nung zel.

Nizan khan table-a pahnihna Real Madrid leh Atletico Madrid an inlan a, he thu buatsaih a nih lai hian result kan hre hman lo - Real hian hnehna an chan chuan point thumin Barca an hnaih leh sawt ang.

Inrinni zan inkhel dangah team talbuai Sevilla chuan 3-0 a Elche hnehin, relegation zone an hlat zel a, Youssef En-Nesyri chuan goal hnih a khung bakah Marcos Acuna chuan goal khat a khung bawk.

Pedri = 100

Girona khelmualah Barcelona beisei angin thil a kal lo - hrem vangin striker chhuanvawr Robert Lewandowski leh Spain forward Ferran Torres te an la inlan thei lo a, player pahnih tel loin Catalan club tlarhma a hriam tawk lo.

Lewy awm loh laia Barca tana beiseina kengtu ber, French winger Ousmane Dembele chu minute 26-na lekah malpui hliam vangin lakchhuah a ngai bawk a, Barca an talbuai takzet.

Mahse, minute 61-naah Dembele thlaktu Pedri a inlar a, Jordi Alba cross Girona keeper Paulo Gazzaniga-a'n a lo dan per chu kum 20 midfielder hian hnai set sawt aṭangin goal-ah a chantir.

Spain tana vawi 18 inlan tawh Pedri hian Barcelona tan inelna hrang hrangah match 100 a khel tling ta a, goal 15 khungin, assist vawi sarih a nei - tun season-ah match 26 khelin goal ruk a khung tawh.

Champion kalkawng

Barcelona-in tun season-ah Spanish Super Cup champion nomawi an chawi tawh a, Champions League aṭangin tla tawh mah se La Liga, Copa del Rey leh Europa League-ah beisei an la nei mek bawk.

Catalan club hian league-a hma an hruai bakah, Copa del Rey-ah semifinal an lut tawh a, Europa League knockout round playoff-ah Manchester United nen an la intawng leh dawn bawk a ni.

Barcelona hian October 16 khan Real Madrid chu 3-1 in an ngam lo a, mahse, hemi hnuah hian league-ah tlawm an nei leh tawh lo. Vawi riat hnehna changin, vawi khat an draw a, inelna hrang hrangah match 13 chhung a zawnin an tlawm tawh lo bawk - a nep lo hle.

Girona erawh table-ah 12-na niin, relegation zone an hlatna erawh point li chauh a ni a, Barca lakah coach Michel chuan Barcelona midfielder Frenkie de Jong-a foul danah a lungawi lohna a lantir nasat avangin hnawhchhuah a ni bawk.