Inter Milan chakna Martinez

Lautaro Martínez-a goal hnih hmangin Inter Milan chuan Cremonese 2-1 in an hneh a, Serie A champion an beiseina meichher thi ṭep tawh chu an la chhawm nung ve zel.

Inrinni zana Giovani Zini Stadium-a inkhelah, mualneitu Cremonese hian David Okereke hmangin hma an hruai. Mahse, mikhual Inter lamin chawlhlawk hmain Martinez hmangin an sut.

Second half-ah pawh Argentina international striker a hmuhnawm a, an chakna goal a khung zui leh bawk - Martinez hian Serie A season kal laiah match 20 aṭangin goal 11 a khung tawh, ani aia khung tam pahnih chauh an awm.

Inter hian match 20 aṭanga point 40 hmuin table-ah pahnihna an ni a, khelh khata khel tam chungin hmahruaitu Napoli chu point 10 ngawtin an phak lo, champion tur chuan Naples club an chetsual viau a ngai tawh ang.

Inkhel dangah Atalanta chuan Joakim Mæhle leh Ademola Lookman goal hmangin Sampdoria chu 2-0 in an hneh a, point 38 neiin palinaah an inhlangkai. Season thara Champions League khelh an beiseina chu an la chhawm nung ve zel a ni.