Serie A Champion-in Roma an hneh lo

Serie A champion Juventus-in league match hnuhnung berah AS Roma 3-1 in an hneh lo. Maurizio Sarri-a'n league match tawp berah Champions League ngai pawimawhin Cristiano Ronaldo leh Paulo Dybala te a dah ṭha.

Inrinni zan khan Juventus-in an mual Allianz Stadium-ah AS Roma an mikhual a, minute ngana lekah Gonzalo Higuain hmangin hma an hruai. Amaherawhchu team ṭha ber nena thawk chhuak lo Juve ṭhat tawk lohna a lang zui a, Roma-in Diego Perotti goal hnih leh Nikola Kalinic goal hmangin hnehna an chang.

Juventus hian August 7, Zirtawpni zan dar 12:30-ah Lyon an mikhual dawn a, Champions League last 16 first leg-ah 1-0 a an chak loh avangin chak ngei an mamawh. Bianconeri-in Ronaldo an lak chhan nia lang chu Champions League a ni a, Serie A-ah champion mah se UCL nomawi an chawi loh chuan season ṭha bik a ni pha lo.

Serie A inkhel dangah Milan-in 3-0 zetin Cagliari an sawp a, Inter Milan-in pahnihna dinhmun nemnghet turin Atalanta 2-0 in an hneh. Antonio Conte hote tan hian Danilo D'Ambrosio leh Ashley Young ten an khung. 

Juventus, Inter Milan, Atalanta leh Lazio ten season tharah Champions League an khel dawn. Chutihrualin pasarihna Napoli leh pangana Roma te Champions League leh Europa League an champion ve ve a nih chuan Lazio-in Europa League an khelh ngai a dawn.

Ram pakhat aṭangin team panga aia tam Champions League-ah khelh theih a ni lo a, Champions League leh Europa League-a champion te UCL an khelh ngei a ngaih bawk avangin Lazio tan Europe inelna sang ber hi khelh loh theih a la ni.