France-a roreltu Paris St-Germain

Paris St-Germain-in French football an thunun chhunzawm zel a, kum ruk chhunga a vawi li nan domestic treble champion an ni leh ta. French club hian Zirtawpni zan khan Coupe de la Ligue final-ah Lyon chu hun pangngaiah 0-0 in an inhnehtawkpui a, penalty hmangin 6-5 in an hneh zui. 

April-a Ligue 1 tihtawp a nih khan fal taka hmahruaitu PSG chu champion-ah puan an ni a, July 24 khan French Cup final-ah Saint-Etienne chu 1-0 in an hneh bawk. Zirtawpni zanah League Cup an champion leh tak avangin domestic treble champion an ni ta a, Champions League quarterfinal an luh tawh bawk avangin hmabak a êng hle. 

PSG-in hliam vangin an forward chhuanvawr Kylian Mbappe an chhawr thei lo a, heti chung hian tlarhmaah Mauro Icardi, Angel Di María leh Neymar an awm avangin goal khung kawngah ngaihtuahawm tura ngaih an ni lo. 

Lyon-in tlarhmaah Moussa Dembélé leh Liverpool leh Borussia Dortmund nena sawizawm Memphis Depay an neih ve tho avangin PSG tlarhnung tan thlamuang taka awm a harsa ve tho tura ngaih a ni.

Mahse, Stade de France-a inkhel entu mipui 5,000 pungkhawmin an duh ang an hmu lo - inkhel hmuhnawm tia sawi tur a ni lo a, penalty hmanga chak zawk an zawn tih lohah chuan fans tan hlauthawnga awmna tur a awm meuh lo a ni ber. Hetihlai hian Lyon defender Rafael chu extra time minute 119-naa Angel di Maria laka a foul avangin hnawhchhuah a ni a, PSG tan a tam zawk nihna chhawr hun hman erawh a awm lo. 

Team pahnihin minute 120 chhungin goal khung an harsat a, a tawpah penalty hmangin chinfel a ni - penalty-ah pawh team pahnih an inhnehtawk a, penalty hmasa 10 chu a lut vek!

Mahse, PSG tan goalkeeper tawnhriat ngah Keylor Navas chuan  Bertrand Traore-a pet a dang a, PSG tan a vawi ruknaa pettu Pablo Sarabia chuan a pet goal avangin a tawpah 6-5 in PSG an chak. April-a Ligue 1 tihtawp a nih avangin pasarihnaa season khar Lyon-in league hmanga European football an beiseina chu an mangṭha a, League Cup final-ah an tlawm leh tak avangin beiseina an neih chhun chu Champions League chiah a ni tawh. French club hlun hian 1996-97 season hnua a vawi khat nana European football khelh loh an duh lo a nih chuan Champions League nomawi chawi an mamawh a, last 16 first leg-a 1-0 a an hneh hnu Juve chu August 7 zan hian second leg khel turin an lenchilh ang. 

French football-a PSG rorelna hrilh nawn fo kan ngai tawh lo - mahse Arab sum hmanga indin lian he club hian an duh ber Champions League nomawi erawh an la chawi thei lo a, tun season-ah chawi ngei an tum ang. PSG hian August 12 zanah Atalanta chu Champions League quarterfinal an khelhpui dawn a, inelna hi Covid-19 vanga single leg-a khelh tur a nih tawh avangin vawi khat chetsual a pawi dawn. 

French club hian Ligue 1 tihtawp hma a nih avangin an duh ang match an khel tam tawk lo a, Atalanta nena an inkhelh hma hian Sochaux nen friendly match an khel dawn - Atalanta hi Serie A lamah pawh team hmuhnawm an ni a, a awlsam dawn lo. Hetihlai hian Ligue 1 hi August 23-ah chuan khelh ṭan a ni leh tawh dawn a, season hmasa tihtawp kha a tuartu langsar chu Lyon an ni -  league tihtawp a nih khan Europa League khel phak tura awm chin pangana Nice leh parukna Reims chu point khat chiahin an phak lo a, Champions League nomawi an chawi a nih ngawt loh chuan an thinrim a zual ang.