FA Cup: Champion lai Liverpool an tla

Liverpool thawnthu a danglam thei lo - an tlawm leh tawh! FA Cup champion lai hian Pathianni zan khan Brighton & Hove Albion chu 2-1 in an ngam lo a, FA Cup fourth round aṭangin petchhuah an ni.

Reds hian minute 30-na lekah Harvey Elliott hmangin goal hmahruai an khung a, harsatna nei loin an tlang mai dawn nia ngaihna a lian hman - mahse, Brighton-in ruahmanna dang an nei.

Hmanni lawka Premier League-a 3-0 a Liverpool sawptu team hian goal an chhuah aṭanga minute kua hnu lawkah Lewis Dunk hmangin si phurh an sut a, Kaoru Mitoma chuan hun pek belhah chakna goal a khung zui.

Thawnthu an chang ta

Season hmasa, tun ang hunah kha chuan English football-a la thleng ngai lo ti thei dinhmunah Liverpool an ding a, Champions League, Premier League, League Cup leh FA Cup-ah te champion thei vek dinhmunah an ding.

Mahse, kum a liam leh meuh chuan thawnthu a danglam zo ta - Premier League-ah hmahruaitu Arsenal chu point 21 zetin an thlau a, League Cup leh FA Cup aṭangin an tla a, Champions League chiah nomawi beisei ngamna an nei tawh.

Brighton khelmualah Liverpool hian beiseina sang tak an nei a, Elliott hmangin minute 30-naah goal hmahruai an khung. Mahse, kar hnih liam taa 3-0 a Liverpool hnehtu Brighton an inringtawk tlat a, Reds an lehthal.

A hunah tak

Liverpool tan Mohamed Salah chuan hma takah goal khung theihna remchang nei mah se Dunk a inrawlh hman a, Brighton tana Evan Ferguson khung ngei tura lang Trent Alexander-Arnold-a'n goal line aṭanga a lo pet chhuak hman te chu, Reds an vannei takzet.

Brighton an khel ṭha a, an si phurh sut danah erawh vanneihna a tel - minute 39-naah Tariq Lamptey-a shot naran tak chuan Dunk a per a, Liverpool goalkeeper Alisson-a rin loh lamah ball kalin, Brighton-in si phurh an sut.

Minute 90 thlengin goal dang a lut lo a, Anfield-ah replay khelh a ngai ngei dawn niin a lang. Mahse, Brighton-in vanneih vang ni lo, thawhrim rah an seng a, hun pek belh minute hnihnaah Mitoma chuan mawi zetin chakna goal a khung - video assistant referee hmanga ennawn ni mah se, pawmsak an ni.

Enge a chhan?

Season hmasa lawka nomawi pali beisei kha an tlusawp ta a ni ber a, Liverpool chet chhiat chhan an inzawt nasa - kumina match ruk an khelhah vawi khat chiah an la chak a, defender Andy Robertson chuan, "Kum bulah khan ṭha taka bul ṭan kan beisei a, mahse, a hma ai maha chhiain kan khel a ni," a ti tawl mai!

Tun hnaia Liverpool chet fuh tawk loh chhanah puh tur tam tak a awm ang a, chung zinga langsar tak chu season hmasaa an inkhel hnem lutuk kha a ni. Reds-in season tawp thlenga nomawi pali chawi an beisei avangin match 63 tehmeuh an khel.

Liverpool midfielder Thiago Alcantara chuan tun hnaiah, nomawi pali beisei chunga, PL leh CL ber an chawi lo khan nasa takin player rilruah nghawng a neih thu a sawi a, result enin, a thusawi hi ṭawmpui loh rual a ni lo.

Hliam an tam

Liverpool tan an thiampuipa Salah-a'n season dang a phak lo chu an talbuai chhan langsar a ni a, a inhliam loh lai pawhin Roberto Firmino-a'n uaithlak lam a pan tawh tih a lang a, Sadio Mane an hralh a, a thlaktu atana an lakluh Darwin Nunez hian Mane hnutchhiah pheikhawk a la inthawlh tawk chiah lo bawk.

Hei chauh a ni lo - player nung ṭha tak, Mane an hralh ngam chhan langsar tak Luis Diaz a inhliam a, Diogo Jota a inhliam bawk a, Virgil van Dijk lahin hliam vangin khelmual lam a hawi thei rih lo. Liverpool buaina hi a thuk hle.

Reds manager Jurgen Klopp chuan, "Inrintawkna kan neih let a ngai - a tih aiin a sawi a awl zawk a, mahse, hei hi result kan neih theihna tur chu a ni. Hmasawn kan mamawh a, kan chet dan fuh tawk lo a awm a, kha aia ṭha khan kan ti thei. Mahse, hmanni lawkah khan he hmunah hian kan chak zo lo a, zaninah erawh chak ta ila, miin mak an ti lo ang," a ti a, hma an sawn thu a sawi.