Hnehna ropui ber a ni - Djokovic

Novak Djokovic chuan a vawi 10 nana Australian Open nomawi a chawi thei chu ropui a ti hle. Grand Slam champion hnem ber Rafael Nadal nih rual tura a chak dan chu a hun tawn tawha hnehna ropui ber a ni tih a sawi.

Djokovic hian Pathianni tlai khan Stefanos Tsitsipas hnehin Australian Open nomawi a chawi a, season hmasa khan Melbourne khawpui aṭanga thawn haw a nih avangin kumina hlawhtlinna a chang hi a ngai hlu zual.

Lawmna mittui

Rod Laver Arena-ah inkhel thunun tak chungin Djokovic hian hnehna a chang. Point hnuhnung ber a hmuh hnuah lawm avangin a biangah mittui a luang, a hmuna inkhel entu a team te chuan Novak dinhmun hi an hriatthiampui hle.

Kum 35 mi Djokovic chuan, "Tun hnai chawlhkar nga chhung vela harsatna ka paltlang hi ka team leh chhungkua bakin min hriatthiampui phak lo ang. Chhung lam leh pawn lama thil thleng zawng zawng nan ka chhut a, ka tan chuan hnehna ropui ber a ni," a ti.

A team awmna aṭanga a ṭhutna hmun a pan lehna lamah pawh Djokovic hi a hnuk a ulh tlat, kum danga a champion fo tawhna ni mah se kumin chu a boruak a danglam tlat, season dang nena khaikhin theih a ni lo.

Australian Open bikah hian vawi kua a champion pawh khan record nei ṭha ber a ni sa tawh, tunah chuan a record ṭha sa hi a sawhngheh belhchhah zel a, player dang tan chuan khum a harsa ve tawh khawp ang - season tharah pawh Novak bawk hi boruak nei lian a la ni dawn.

Ropui taka kirna

Thla 12 liam ta mai kha a la ni, hripui leng vangin ram tam tak an la inkharkhip. Australia pawhin dan khauh tak an nei, an rama zin lut tur tan chuan Covid-19 laka invenna lak ngei a ngai, vaccine la lo tan an rama zin luh phal a ni lo.

Vaccine la lo Djokovic chu Australia khawpui pakhat Melbourne-ah a zin lut, hei hi mipui lamin an hriatin an thinur hle - sorkar thuneitu lamin Novak hi an thawn kir leh nghal a, a champion nomawi humhim tur pawhin Australian Open a khel thei lo.

Kuminah erawh Australia hian hri leng chungchanga inkaihhruaina an thlahdul ta hle. Covid-19 kai chung pawhin tournament khelh theih dan tur thlengin an ruahman, vaccine la lo Djokovic pawh dip buaitu awm miah lohin a inlan thei.

Tournament tir lamah Djokovic hi a malpui a hliam, mahse hliam na tak erawh a ni lo hlauh. A malpui tuam chungin inelna a hmachhawn chhunzawm a, final an khelh meuh chuan a tuamna pawh a hlip thei ta - a tan chuan engthawlna tham a ni ngei ang.

A hlu asin

Hliam nei chungin Australian Open a khel lui a, a coach Goran Ivanisevic chuan, "A natna tawrh ang tuar player dang 97% chu an inhnukdawk ang," tiin a sawi hial a, natna nei chung pawhin tennis a vaw thei a nih chhung chuan bansan kha a tum lo.

Djokovic chuan, "Kar hnih liam ta kha ka ngaihtuah let a, tun tournament hi khel lo thut thei dinhmunah ka ding. Khatihlai kha ka ke a hliam a, vanneih thlak takin inelna tak chu ka hmachhawn ve thei hram chauh a ni.

"A nihna takah chuan match hmasa ber aṭangin a harsa nghal, round sang zawk lut tur khan theihtawp takmeuh ka chhuah vek. Grand Slam ṭhat vena chu match kan khelh kar lakah ni khat chawlh kan nei ṭhin kha a ni a, ka tan chuan a ṭangkai takzet, a ti.

Australian Open champion a nih avang hian world number 1 thar a ni leh ta a, ranking chung berah hian chawlhkar 374 chhung a awm tawh a, record nei ṭha ber a ni. Amah hnaih bertu Roger Federer a chawl tawh a, a record hi a la nghet zel dawn.

Pafa boruak

Novak Djokovic hian quarterfinal-ah Russian tlangval Andrey Rublev a hneh. He inkhel boruakah hian Russian mi ṭhenkhat chuan an president Vladimir Putin an thlawpna thuziak an pho chhuak, an kiangah hian Djokovic-a pa Srdjan Djokovic pawh a tel.

Srdjan-a te thlalak hian sawi zui a hlawh nghal, a fapa in buaina a nei palh ang tih a hlauh vangin Srdjan hian semifinal aṭang khan Rod Laver Arena-ah a fapa inkhel hi a en tawh lo - TV lam aṭangin a lo en chhunzawm ta zawk a ni.

Djokovic chuan, "Thil thleng kha pawi kan ti, ka pa hian indona a thlawp ngai lo tih a taka hretu ka ni. Mahse, mi tam takin an thil hmuh pakhat avangin an ngaihdan an sawi nasa si a, chuvangin final a hmuna en lo tur khan thu kan titlu.

"Ka nu Dijana kiangah ṭhutna pakhat a ruak a, ni dang ang chu ni se ka pa a ṭhu ngei ang. Ka pa rawn kal lo tura thutlukna siam kha a harsa pawh ka ti hle, a rilru pawh a na," a ti a, a tan chuan tournament a khelh tawh zinga chona hautak ber a nih thu a sawi bawk.

Novak vs Rafa

Djokovic hi kum 35 mi a ni a, a elpui Nadal chu kum 36 mi a ni thung - player ropui pahnihten Grand Slam title an neih zat chu 22 ve ve a ni. Tun season atan Australian Open an zo, an hmabak chu French Open, Wimbledon leh US Open te an ni.

Serbian star Djokovic-a coach Ivanisevic chuan, "Spain leh Serbia inbeihna a ni a, tunah hian 22-22 a ni mek, kumin chu tun aṭangin a ngaihnawm nghal khawp mai," a ti, a player hi khawvel dang aṭanga lo kal ang maia ṭha bik a nih thu a sawi tawh bawk.

Grand Slam an khelh hmabak chu French Open niin May 28 aṭangin an khel ṭan ang. Paris khawpuia inelnaah hian Nadal chu champion lai a ni a, vawi 14 ngawt a champion tawhna a nih avangin kuminah pawh rinkai a ni leh ang.

Wimbledon chu Novak-a hlawhtlin theihna hmun a ni a, a buk a rit zawk ang. US Open chu player ropui pahnih hlawhtlin theihna ve ve a ni ṭhin, tun dinhmunah chuan Djokovic hi United States ramah a zin lut thei ngei dawn em, tih a la chiang lo.