Chelsea-in Gusto an lalut

UEFA meuhin Chelsea vangin Financial Fair Play dan an neih an siamrem a, heti chung hian Chelsea-in thlasik transfer-ah bazar an ṭhulh lo - Lyon aṭangin French right-back Malo Gusto chu pound maktaduai 30.7-in an lalut leh ta.

Kum 19 mi Gusto hian kum 2030 nipui thleng Stamford Bridge-a cham turin contract a ziak a, mahse, tun season-ah erawh Chelsea a la pan rih dawn lo a, season tharah London club hi a zawm ve chauh ang.

Chelsea chuan, "Kan defender thar hian a season duhawm tak hman chu, loan-in Lyon-ah a la chhunzawm leh phawt dawn a, nipui hunah Blues chu a zawm ang," tiin thuchhuah an siam.

France tana age level hrang hranga inlan tawh Gusto hi Lyon aṭanga inzir chhuak a ni a, January 2021 khan French club tan hian a match hmasa ber a khel ve chauh.

Gusto hian tun season-ah Lyon tan match 15 a khel tawh a, season hmasa khan match 37 zet a lo khel tawh bawk - a kum zat ngaihtuahin tawnhriat a nei ṭha hle.

Lyon chuan an player hmabak nei êng tak an chelh thei lo chu pawi an tih thu an sawi a, chutihrual chuan 2022-23 season an hnena a hmang zo thei tur chu an lawm thu an sawi bawk.

Chelsea hian tun thlasik transfer-ah Gusto hma hian PSV Eindhoven winger Noni Madueke (£30mtd), Shakhtar Donetsk forward Mykhailo Mudryk (£89mtd), Molde striker David Datro Fofana (£8mtd -10mtd), Vasco da Gama midfielder Andrey Santos (?) leh AS Monaco defender Benoit Badiashile (£35mtd) te chu a nghetin an lalut tawh a, Joao Felix chu Atletico Madrid aṭangin loan-in an la bawk.

London club-in thlasik transfer-a player lakluh nana an sen hi pound maktaduai 160 chuang a ni tawh a, an pek belh turte nen chuan a la san belh dawn hle.

Thlasik bazar hi Premier League tan chuan zaninah a tawp dawn. Arsenal-in Brighton midfielder Moises Caicedo chu tun thlengin an la lalut thei lo a, hun a ngah tawh lo. Leeds erawhin Juventus aṭangin loan hmangin Weston McKennie an lakluh hmel thung.