Newcastle-in £45m-in Gordon an lalut

Newcastle United chuan Anthony Gordon chu Everton aṭangin an lalut a, English forward man hi pound maktaduai 40 niin pound maktaduai 45-a pung chho thei tur a ni.

Magpies hian zanin dar 1:30 hian Southampton nen Carabao Cup semfinal second leg an khel dawn a, Gordon erawh Everton tana League Cup a khelh tawh avangin an chhawr thei lo ang.

Tu nge Gordon?

Kum 21 mi Anthony Gordon hian kum 11 a nih aṭangin Everton a zawm a, England senior team tan la khel pha lo mah se Three Lions tan kum bithliah inelna hrang hrangah a inlan tawh.

Gordon hian kum 2020 aṭangin Everton tan Premier League-ah a khel ṭan a, 2020-21 khan intuai hriam turin Preston North End a zawm. Season liam ta khan Toffees tan match 35 khelin goal li a khung a, tun nipui khan Chelsea pawhin lak tumin an hel hial.

Tun season-ah Gordon hian league match 16 khelin goal thum a khung tawh a, amahaherawhchu kumin bikah English forward hian Everton tan bul a la ṭan lo.

Theihna nei sang

Newcastle foward thar Gordon chuan, "Newcastle-in min duh tih ka hriat aṭang khan ka khelhna tur club-ah ka ngai nghal. Ka theihna tak hi ka la lantir lo a, tun aia ṭha zawk hian ka la khel thei ang.

"Newcastle khua hi nuam ka ti a, an club hian ṭantu an nei ṭha bawk. Tuna an coach hnuaia an khelh dan hi ka khelh dan nen a inremin ka hria a, kawng dik an zawh mekah ka ngai bawk," tiin a sawi a, Magpies tan a theihna sang zawk a lantir theih a beisei.

Magpies boss Eddie Howe pawhin, "Anthony nena kan thawkdun tur hi ka lawm a, hma a sawn theihna tura puih hi ka duh. Newcastle kawr nena a theihna a lantir hun hi ka nghakhlel a ni," tiin a sawi.

Gordon hi League Cup semifinal-ah a inlan theih dawn loh avangin February 4-a West Ham an mikhual hun tur chu a inlan theih hmasak ber hun a ni ang.

Semifinal chu

Newcastle United hian first leg-ah Southampton chu 1-0 in an hneh a, goal awmchhun hi Joelinton-a khung a ni. Eddie Howe-a hote hian St James' Park-a an khelh dawn avangin dinhmun ṭha zawkah ding mah se goal khat ringawt hi chu a him lo.

League Cup semifinal-ah hian away goal rule a awm lo a, Saints hi goal khata an chak a nih chuan extra time khelh a ni dawn. Extra time khelh hnua chak zawk an awm lo a nih chuan penalty shootout hmanga chak zawk zawn tur a ni.

Newcastle United-in League Cup hi an la chawi ngai lo a, tualchhung inelnaa nomawi lian tham an chawi hnuhnun ber chu kum 1955-a FA Cup an champion daih tawh kha a ni. Hemi a nih avang hian Magpies tan zanin inkhel tur hi a pawimawh hle.