Santosh Trophy - Vawiinah Mizoram dinhmun a hriat dawn
76th National Football Championship for Hero Santosh Trophy-ah Mizoramin first round an khel zo tawh a, Kerala laka an mualpho avangin tun thlengin an dinhmun a la chiang lo. Vawiin hian group VI-in group match hnuhnung ber an khel ang a, Mizoram dinhmun pawh a chiang thei ang.
Group VI-ah hian Manipur leh Punjab te chauhin final round luh beiseina an nei tawh a, team ṭha pahnih hi vawiin tlai dar 2:00 hian Khuman Lampak Main Stadium-ah an inkhel dawn. Manipur-in point an hmuh chuan Mizoram an tling ang a, Punjab an chak erawh chuan Mizoram beiseina a tawp ang.
Tling sa 2 leh a thlengtu
Tun ṭum Santosh Trophy-ah hian Services leh Railways te chu duhsak an ni a, first round khel loin final round an lut nghal. Services hi vawi ruk champion tawh an ni a, pahnihna pawh ṭum nga ngawt an ni tawh.
Railways pawh vawi thum champion tawh an ni a, ṭum ruk final an lut tawh. An champion hnuhnun ber erawh 1966–67 daih tawh kha a ni a, tun hnaiah sulhnu ṭha an nei lo. Kum 2014 khan final an lut leh a, Mizoram lakah an tlawm.
Final round-ah team 12 awm tur a ni a, Services leh Railways bakah inelna thlengtu chu tling sa an ni. Tun ṭum final round hi Odisha-in an thleng dawn. Odisha hian first round an khel a, group V-ah pahnihna niin Mizoram aiin an an result a chhe zawk. Mahse, Odisha hian final round an thleng dawn miau a, inkhel dang result nghah ngai loin an tling.
Pakhatna paruk
First round-ah hian team 36 an awm a, group parukah ṭhendarh an ni. Group I-ah Delhi chu pakhatna an ni a, point 13 an hmu. Delhi hi an match hmasa berah Tripura nen inhnehtawk mah se an elpui ber Karnataka an hneh.
Group II-ah Kerala pakhatna an ni a, an elpui ber tura ngaih Mizoram chu 5-1 ngawtin an sawp. Group III-ah Goa chu pakhatna an ni a, Uttar Pradesh leh Nagaland an draw avangin an tling hram.
Group IV-ah West Bengal-in an khingpui hneh vekin an tling a, group V-ah Meghalaya chu pakhatna an ni. Meghalaya hi pakhatna ni mah se Sikkim leh Odisha nen an inhnehtawk.
Group VI aṭanga tling tur a la hriat loh. Tun dinhmunah Manipur dinhmun a ṭha a, amaherawhchu vawiin tlaia Punjab an hneh loh chuan pahnihna an ni thung ang.
Pahnihna pathum
Group I pahnihna Karnataka leh group IV pahnihna Maharashtra ten point 12 an hmu thei a, an goal difference pawh +16 leh +10 a nih phak avangin group VI result nghah ngai tawh loin an tling.
Hmun ruak pakhat la awm hi group III pahnihna Nagaland tan beisei theih a ni tawh lo. Nagaland hian point 11 an hmu a, Mizoram aia point an hmuh tlem avangin beisei tur an nei tawh lo. Group V pahnihna Odisha erawh point 10 chauh hmu mah se final round an thleng dawn a, inelna thlengtu quota-in an tling.
Mizoramin khelh tur an neih tawh loh avangin vawiina Manipur leh Punjab inkhel tur hi a pawimawh dawn. Punjab hian Chandigarh lakah point khat chauh an hmuh avangin Manipur laka hnehna an chang lo a nih chuan Mizoram an pha thei dawn lo.
Punjab hi an chak a nih thung chuan Manipur chungah an awm dawn a, pakhatna ni chungin an tling ang. Manipur leh Mizoram te buk an ni ang a, goal difference hmangin Mizoram an tla ang. A chhan chu Mizoram goal difference hi +5 a ni a, Manipur erawh +11 daih a ni. Punjab hian Manipur hi goal ruka an hneh theih a rinawm loh avangin Mizoram innghahna tur Manipur a ni ang.
