Real Madrid an chak zo lo; Barca an thlah fal
Barcelona chak laiin Real Madrid chu an league match hnuhnung berah an chak zo lo a, an mikhual Real Sociedad nen 0-0 in an inhnehtawk - Barca an kal fal zel.
Real an chak zawh loh avangin Barcelona hi point nga ngawtin league table chung berah an tla fal ta a, Spanish champion Real tan nomawi humhim tur chuan hna a hautak zel dawn.
Hetihlai hian season duhawm tak hmangtu Real Sociedad chuan Santiago Bernabeu-a Real chelh theih hi result ṭha, tia sawi ngam a ni a, table-ah pathumna an nih chhunzawm zel.
Season thara Champions League khelh tum Atletico Madrid pawhin hnehna an chang a, an mikhualna ramah Osasuna chu 1-0 in an hneh - Saul Niguez chuan inkhela goal awmchhun hi a khung.
Inkhel hmuhnawm
Santiago Bernabeu-ah Real-in chak an tum - mahse, Vinicius Junior chuan minute 17-na lekah uiawm takin chance a hlah a, Toni Kroos-a khung ngei tur nia lang chu mikhual goalkeeper Alex Remiro chuan ṭha zetin a dansak bawk.
Real hian first half tawp hmain Dani Ceballos hmangin chance duhawm an nei bawk a, mahse, goal zawnah a pet lo - Karim Benzema siamsak, Vini-a'n hnai set sawt aṭanga Remiro a pet per ringawt pawh uiawm tak a ni.
Second half-ah pawh Real-in an nawr chhunzawm a, mahse, a pawimawh ber goal an khung thei tlat lo. Rodrygo chuan minute 49-na lekah uiawm takin a hlah bawk a, Real vanneih zan a ni lo.
Minute 71-naah Vini chuan mawi zeta lalutin, Remiro chu pet khum a tum a, mahse, Spain tana la inlan lo keeper hian an ram team tana inlan turin a ṭha tawk a ni tih pholan nan, pui zetin a lo dang.
Lungawi a ṭul
Sociedad hian chance nei lo tawp an ni bik lo - Real Madrid tan pawha lo khel tawh Asier Illarramendi chuan goal hrulah a pet a, Japanese forward Takefusa Kubo a hnawksak bawk.
Kum 21 mi Kubo hi Barcelona academy-ah te pawh lo awm tawh ṭhin, kum 2019-a Real Madrid zawm thlangtu kha a ni a, mahse, Real tan hian competitive match-ah a inlan hman lo.
Madrid khaw club inlan zingah Real an chak lo a, hetihlai hian Atletico Madrid erawh an chak thung. Osasuna khelmualah Diego Simeone-a naute pawh hian goal an khung lo mai dawn niin a lang hman.
Mahse, minute 74-naah bench aṭanga luhtir Saul Niguez chuan goal a rawn khung a, 1-0 in Atletico an chak - table-ah palina an nih chhunzawm zel a, mahse, an hnuai chiaha awm Villarreal-in nizana Rayo Vallecano an hneh chuan an point hmuh zat a inang dawn; he thu buatsaih a nih lai hian result kan hre hman lo.