Kerala Blasters-in beisei an la nei zel

Pathianni zan khan Indian Super League inkhelah Kerala Blasters chuan 2-0 in NorthEast United an hneh a, playoff khel tura an beiseina an la chhi nung ve zel - Greek striker Dimitrios Diamantakos chuan goal hnih a khung.

Greece club ṭha Olym-piakos aṭanga a professional career ṭantu Diamantakos hian minute 42-naah goal hmahruai khungin, minute hnih hnuah a belhchhah leh a, mikhual Highlander lamin a chhanletna tur an nei lo.

Blasters-in hnehna an chan avangin table-ah pathumnaah an invawrh chho a, playoff khelh beiseina a nung zel - Highlander tan erawh table mawngphah luah loh hram dan ngaihtuah chu, tih tur a ni.

NorthEast United tan erawh khelh hmabakah chak vek pawh ni se, playoff khelh theih dan a awm tawh lo a, Highlander bakah hian East Bengal leh Jamshedpur FC ten playoff an khel thei tawh lo.

Pathianni zan inkhelah Blasters-in ATK Mohun Bagan lama K. Lalṭhathanga an kaltir tawh avangin, Mizo player kawl an nei lo a, NorthEast United lamah Rochharzela chu minute 87-naah luhtir ni mah se, a tlai hret tawh - Aizawl FC forward hlui tan danglamna thlen theih a ni tawh lo a, an tlawm.

ISL hi nizanah inkhel a awm lo a, Nilaini zan thleng match awm loin an chawl ang a, Ningani zan dar 7:30-ah Chennaiyin chuan Odisha mikhualin ISL khelh chhunzawm leh a ni ang.