Anthony Joshua vs Andy Ruiz Khawvel barakhaihtu inhnek ropui kha...

Hmanni lawk tak tak kha a ni a, a la rei lo - June 2019-a mak tak maia Andy Ruiz Jr. hmaa boxer rothap leh hriam em em mai Anthony Joshua a tluk kha. 

Khawvelin mak tiin a thlir tlawk tlawk a, chu Mexican-American, boxer dul kiar ve tak chuan pa pian ṭha leh chak, a khingpui apiang hneh ṭhintu Joshua kha a tukdawl maw?

'A mak a ni' tih bak hrilhfiahna dang a awm lo a, chak lo pawh ni se Joshua a hmachhawn theih avang ringawt pawha lawm tur khan WBA (Super), IBF, WBO leh IBO heavyweight kawnghren a hreng ta!

Madison Square Garden, New York khawpuia kil khatah chuan Andy Ruiz-a nu chuan a kut phar chhuakin a fapa chu 'flying kiss' a hlan a, a hmela hlimna chu khawvel ṭawngkaa hrilhfiah zawh chi a ni lo. 

Ruiz-a trainer Manny Robles-a'n mittui nena van lam kawkin kum 12 liam taa a thlah tak a pa hnenah lawmthu a sawi a, hei hi an tan chuan 'duhthusam' chu a ni. 

MSG dressing room pakhatah Joshua erawh a pa chuan, "A bul aṭangin ṭan leh rawh," tiin a lo hrilh mawlh mawlh a, Joshua ṭhian ṭha ber David Ghansa chuan a mittui a dang zo lo.  An tan chuan 'mangchhia' a ni. 

New York khawpuiah chuan June 1, zan dar 6:30 a ni a, keini lam sanaah chuan June 2 zing lam dar 4:00 a ni tawh thung - Champions League nomawi chawi hlim Liverpool fans phur fal zual pawh an la meng nual a, European Cup-a vawi ruk champion thei an nihna chu an lawm. 

Sports online media chu English club champion chanchinin a luah khat a, website tinah an ziak emaw tih mai tur a ni - mahse, darkar tlem a liam ang a, rei loteah chu thawnthu ropui chu thawnthu ngaihnawm zawka thlak a ni dawn!

Madison Square Garden-a fans intlarte ticket ṭhenkhatah chuan Joshua thlalak bak a awm lo a, a chhehvela 'poster' intar pawh British boxer-in a luah khat - Joshua nena inhmachhawn tura tih hmasak zawk Jarrell Miller-a'n 'test' a paltlang zawh loh avanga a aiawhtu Ruiz-a'n ngaihven a hlawh lo. 

Mipui tam tak hmaa inlan turin chu boxer ngaihven hlawh lo chuan MSG a lut a, a career-a a hun tawn ropui ber - a tawn leh ngai tawh loh tur pawh a ni hial mai thei e. Chutiang hun tawng tur chuan a pen lut a ni. 

Boxer leh dul kiar inhmeh lohzia chu Mother's Day-a Sir Elton John lo va 'wish' ve phet ang a ni. Mahse, Ruiz chu a dul a kiar tlat, nia a fawn hlur hlur thei! Thawm zawi tak karah ring lam a pan a, dawhthei takin Joshua lokal hun a nghak a. 

Ring lam pana Joshua lokal zet zawng 'an thawm mitdelte hriat khawp' a ni a, chu ringawt pawh chu Ruiz tan zamna tham a ni. Mahse, kil khatah zam hauh loin a ding reng a, a hmelah hlauhna hmuh tur a awm lo. 

Hetihlai hian British boxer Callum Smith, Joshua te inhnek hmaa lo inlan hmasa chuan damdawi 'test', backstage lama a neih lai a ni. An room TV-ah chuan Joshua leh Ruiz inhnek tur chu an en ve pah reng a, an nuih a za hlawm tlat. 

Test neitute chuan, "Nangmah ai pawhin a rang dawn a nih hi," tiin hemi zana round thumna leka WBA (Super) middleweight title a kawl lai humhimtu Callum chu an hrilh a, Joshua chuan round thumna hmaa Ruiz a tukdawl an ring. 

ṭhin Joshua kuttum kha Ruiz pawhin round thumnaah a tlukpui ve hnap a, midang aia a danglam zawkna erawh thawh phut lu hai nei miah loa a tho leh mai thei kha a ni. 

Joshua-a'n a cho sual ta. Ruiz-a'n huaisen takin British boxer a bei chhunzawm a, Joshua hi vawi hnih ngawt a tlu a nih chu! MSG-a inhnek entuten mak tiin an thlir a, khawvel mipuiin an thil hmuh chu a tak ngei a nih leh nih loh fiah nan an mit an nuai. 

Anthony Joshua trainer Rob McCracken-a'n awlsam takin an chak dawn lo tih a hrethiam ṭan a, a nau hmel en chungin, "Hnek fuh tum rawh, chu chuan a tha za a ti reh dawn a ni," a ti a, Ruiz-a attacking game rang tak tihtawp dan a ngaihtuah. 

British entertainer James Corden chu a beisei loh inhnek entu zinga mi a ni. "AJ ṭang ta che," tiin a au leh ṭhin a, a bula mite ang thoin Joshua talbuai lai a hmu ta mai chu mak a ti a ni. 

Ruiz-a'n inhnek a thunun a, Joshua a talbuai tih a hai lo. 

Ruiz-a trainer Manny Robles chuan, "I hnek avang khan a talbuai tih i hmu vek a, a lu tum tawh ang che," tiin round sarihna an ṭan hmain a nau hi a hrilh. 

Britain boxer lar ṭhin David Haye pawh a awm mai mai thei lo - amah ang thoa Britain boxer zawr lai hmuh chu hrehawm a ti a, a hnung lama chanchinbumite ngaihtuah lo lekin a ding leh hluai ṭhin a, a ṭhu leh a!

Round sarihnaah vawi hnih ngawt Joshua a tlu nawn a, ngamtu awm loa leng a, cho loh nei lo val kha a tlawm ta. MSG-a camera zawng zawng chuan Joshua lam an hawi a, khawvel hmaah a tlawm lai phochhuah a ni. 

Ring kil khatah a khup pakhat leia nghat chungin Joshua a ṭhingṭhi a, a hnungah chuan hun rei tak chhung a manager lo ni tawh Freddie Cunningham a ding a, a hmelah chuan 'zawhna' hlir a khat tih hai rual a ni lo. 

Joshua promoter Eddie Hearn chuan a beisei loh thil a hmu tih a inhria a, a hrilh a hai takzet. Hearn chuan, "Sawi tur reng reng kha ka hre lo. Boxing-ah hian tawnhriat ka ngah tawk tawh. 

"Hliam rapthlak tak aṭanga thawnthu ngaihnawm ni zui ta tam tak ka hmu a, mahse kha thil thlengah kha chuan mak tih luat avanga awih lohna hi a tel tlat a ni," a ti a, boxer 'naran' hmaa Joshua tlawm chuan a ṭhawng a ni. 

Joshua tlawm chuan khawvel mak tih a hlawh a, thuthang a awm nghal - "Inhnek hmain Joshua hian hrisel lohna a nei a, backstage-ah a tlu," tih thawm thlengin a awm. Mahse, hei hi a dik tawk loh thu Joshua 'team' lam chuan a hnuah an sawi.

Hetihlai hian Joshua pa chuan ring chhungah na takin Hearn a lo sawisel ve bawk a, thil thleng chuan a nghawng na a ni ber - Ruiz hmelah erawh nui hmel a lang a, minute rei lote liam taa lawmtu nei mang lo khan boxing khawvela belt lian tham pathum keng chungin a ni 'ring' a chhuahsan ni.  

Ruiz-a'n hnehna ropui a chan hnu lawkah media ṭhenkhat hmachhawnin a hma lawka hnehna changtu Callum Smith chuan press mi a lo kawm a, mahse tumahin he British boxer hi zawhna zawh an chak lo. 

Callum chuan, "Awm dan thiam a har zawka, tumah khan min ngaihven lo. A nihna takah chuan mitthi an awm ta thut emaw tih mai tur hian journalist ho chuan press conference lamah rilru an pe thei lo a ni," a ti!

Ruiz a rawn lut a, thawm chu ring tak a ni. "Hei le, champion chu a lo thleng e," tiin journalist pakhat chu a au lauh lauh a, stage lamah promoter Hearn chu lawn chhoin a mak tihnain a la kiansan lo. 

UK lama a ṭhiante chuan hetihlai hian Hearn chu, "I dam lo em ni?" tiin message an thawn hial a, a 'vai' a ni. Mahse, promoter a nihna angin press hmachhawnna kaihhruai chu a tih tur a ni a, a infuih mar sauh sauh a. 

Hlim hmel takin Ruiz a ṭhu a, khawvela boxer rothap ber pawl tukdawltu ka aṭanga chhuak hmasa chu, "Ka nu, ka hmangaih che," tih chu a ni a, a kut phar chhuakin a fawp a, a nu tan tiin a 'chhem' a - a hlim a ni!

Ruiz a sirah hian, naupang a nih laia dan dik loa USA lut ru, a trainer Manny Robles chu a ṭhu a, a mittui a dang zo lo. Kum 2007-a a pa, a hna leh in chantu kha world champion train-tu a ni ta der. 

Awih a harsa a, boxing atchilhtu a pa chanchin an zawh chuan a mittui a dang zo ngang lo a ni - harsatna vawrtawp a tawh lai pawha a lama ṭang reng ṭhin a nupui a lam a, a thinlung chu lawmna leh hmangaihnain a luah khat a ni. 

Hetihlai zawng hian Joshua chu a dressing room lamah a awm a, Ruiz a kal a, Joshua an nghak ṭhup. Mahse, media-te chu Joshua'n media a hmachhawn loh tur thu hrilh an ni a, vawi tam hrilh nawn an nih hnuah a tam zawk an ṭin - Joshua biak an châk tehlul nen!

Message leh social media hmangin Joshua-a'n press a hmachhawn tur thu journalist hoin an hre leh - harsa takin MSG lamah an kir leh a, ropuina reng reng nei lo ang maia Joshua ṭhu lai chu an hmuh a ni. 

Chu boxer rothap chu a team-ten rawn ṭawiawm ve bawk mah se a ṭhen chuan ceiling an en ngawih ngawih a, a ṭhenin an kut chu an tu khum lamah dahin nuamsa takin an ṭhu a, eng zawhna mah chhan an châk lo. 

Joshua chuan a chak loh chu thil thleng palh a nih thu a sawi a, a trainer Robert McCracken chuan, "Zan duhawm lo tawpkhawk a ni," a ti a, tuman an hnial lo - a sawi dik tlat. 

Zankhuain Joshua promoter Hearn a mu thei lo a, Joshua dinhmun a danglam lo - Manhattan-a a inluahah pawn chhuak loin ni thum chhung a tawm a, khawvel hmachhawn a zuam lo. 

Mite ngaihsan leh ngaihven Joshua khan ngaihven nih a duh rih lo a, rilru baihvai takin a awm. Hearn chuan, "Ngaihtuahna mumal pu tur khan hun rei tak a mamawh a, rematch a awm leh theih nan khan rang takin hma kan la nghal a ni," a ti. 

Hetihlai hian Ruiz erawh a la tawn ngai loh thil tam takin a lo hmuak a, engtiklai pawhin a nui emaw tih mai tur a ni. An ram Mexico President meuh hmuin a titipui a,  US talk show lamah a lang deuh reng bawk. 

Kar hmasa lawka journalist pakhat lekin an kawm pawha lawm em em, jeans fual hnek hnuk ha chunga 'Boxer ka ni e," ti ve ṭhin khan Joshua a hneh ta miau a, a hun tawn chu thua sawifiah chi a ni lo. 

Khawvelin champion anga a en ngai loh kha tunah chuan champion a ni ta a, duh lo teh mah se khawvel chuan 'champion' tia an koh a ngai tlat - chu nun chu a nuam em asin!

December 7, 2019 khan Andy Ruiz Jr. leh Anthony Joshua-te hian rematch an nei a, Diriyah Arena, Diriyah, Saudi Arabia-a inhnekah Joshua hi unanimous decision (118–110, 118–110, 119–109) hmangin chak zawkah puan a ni. 

Vawi 21 inhnek a hmachhawna vawi khat chiah la tlawm Joshua hian WBA (Super), IBF, WBO leh IBO heavyweight kawnghren a hloh tawh chu a nei let.

Andy Ruiz hian June 2019-a thil thleng mak kha thlen nawntir lo mah se boxing mai ni lo, infiamna khawvelah chuan hriatreng a ni tawh ang a, ngaihhlut a hlawh zel ang.