Paris Saint Germain chelhtu Reims

Lionel Messi, Neymar leh Kylian Mbappe te chuan World Cup hnua a vawi khat nan inkhel bul an ṭan rual a, mah se Ligue 1 champion lai Paris Saint Germain chu hnehna an chanpui zo chuang lo.

Pathianni zan Ligue 1 inkhelah PSG hi an mikhual Reims nen 1-1 in an inhnehtawk. Paris club tana Neymar goal khung chu, mikhual lamin hun tawp dawnah Arsenal aṭanga loan hmang an hawh Folarin Balogun hmangin an sut.

Tun hnaiah PSG an che ṭha tawk lo, league hmahruaitu la ni tho mah se pahnihna Lens nen an inthlauhna chu point thum chauh a ni, match khat lek chetsualah an point a inzat nghal der thei tihna a ni.

English mi, mahse Belgium rama piang Will Still kaihhruaina hnuaiah Reims erawh an kaltluang, inelna hrang hrangah tun hnaia an match khelh hnuhnung 14-ah tlawm an nei miah lo, league table-ah pawh 11-naah an inhlangkai tawh.

Reims chet ṭhat theih nan hian Balogun a pawimawh. England under-21 international hian league goal 11 a khung tawh, tun season kal laiah hian kum 21 hnuai lamah chuan European league lian pangaah goal a khung hnem ber.

PSG hian league an ngaipawimawh, chutihrualin an ngaihpawimawh ber erawh Champions League a ni thung. February 14, Thawhlehni zanlaiah last 16 first leg khel turin Bayern Munich an mikhual dawn, chumi hma chuan team nung tak neih ngei an tum ang.