Napoli an kang sang tual tual

An inkhelh hmain Jose Mourinho chuan, "Napoli hi Serie A champion an ni fel der tawh," a ti a, Portuguese manager hian Serie A season kal lai a hmu dik viau niin a lang.

Pathianni zan Serie A inkhelah Napoli hian an mikhual AS Roma chu 2-1 in an hneh a, league table-ah point 13 zetin hma an hruai fal ta. Inkhelh bakah Mourinho bawkin, "Kumin chu Napoli kum a ni e," tiin a sawi.

Victor Osimhen-a'n tun season a league goal 14-na hmangin Napoli hma a hruaipui a, mah se mikhual lamin tun hnaia beiseina rawn nei thar Stephan El Shaarawy hmangin si phurh an sut - goal ven thiam Roma tan point hmuh mai a inrinawm.

Mahse, Luciano Spalletti naute hian chak ngei ngei an tum tlat zel a, a tawpah a rah duhawm an hmu leh nge nge. Hun tawp hma minute li chauh awm tawhah Giovanni Simeone-a goal hmangin chakna goal an khung.

Rinkai Napoli

Spalletti-a naute hian Serie A match 20 aṭangin point 53 an hmu thei, pahnihna Inter Milan nen an inkarah point 13 a awm. Diego Maradona hunlai, kum 1990 hnua a vawi khat nan Italian football inelna sang berah champion leh an tum mek.

Chak lo AS Roma manager Mourinho chuan, "A tir lam minute 15 chhung vel kha chu kan khel ṭha hle, mahse Osimhen-a goal khan inkhel boruak a thlak danglam ta a ni. Goal an nawr na a, an inven thiam bakah an tlan tam em em bawk a ni," a ti.

Mourinho chuan sawi zawmin, "Inkhelh hmain ka sawi lawk tawh kha, kumin chu Napoli hun a ni. Khelmual chhung player chet dan hian thil tam tak a sawifiah. League nomawi hi pariat ka chawi tawh, champion dawna boruak awmdan chu ka hria.

"Keini pawhin nasa takin hma kan sawn, tun ṭum inkhelah khan chak zawk ni ila a mak lo ang. Ka naute hian nasa takin hma an sawn, a bul kan ṭan fuh lo deuh khan min pawt hniam rih mai a ni," a ti. Roma hi table-ah parukna an ni mek.

Milan leh Juve

Pathianni zan inkhel dangah champion lai AC Milan chu an mikhual Sassuolo lakah 5-2 in an tlawm. Domenico Berardi, Gregoire Defrel, Davide Frattesi, Armand Lauriente leh Matheus Henrique ten goal an khung laiin, Milan tan Olivier Giroud leh Divock Origi te chauhin an khung.

Kum 1997 April thla hnua a vawi khat nan Milan hian San Siro-a league match an khelh bikah, a ṭum khat nan goal nga an chhuah tling leh ta chiah. Milan manager Stefano Pioli chuan, "Hetiang chuan champion nawn theih a ni lo.

"Champions League khelh phak tal kan tum tur a ni ang, chumi tur chuan a rang thei ang bera thawhchhuah a ngai," a ti. Milan hi panganaah an tlahniam, an chunga awm Atalanta nen point hmuh inzat mah se goal difference an nei chhe zawk.

Tun hnaia point an paihsak Juventus pawh Monza lakah 2-0 in an mualpho. Old Lady hi 13-naah an tlahniam a, point an paihsak hnem bawk avangin an tan season thara European football beisei ngam a ni tawh rih lo.