African player manto ber Victor Osimhen

Serie A club Napoli chuan French club Lille striker Victor Osimhen chu African player zinga manto ber ni turin an lalut a, French chanchinbu lar L'Equipe chuan Nigerian striker man zat hi pound maktaduai 74 niin an sawi!

Premier League club Arsenal chuan kum khat liam ta khan Lille aṭang tho hian Nicolas Pepe chu African player manto ber ni turin pound maktaduai 72-in an lalut a, Pepe thlak turin Lille hian Osimhen hi an lalut. Belgian club Charleroi aṭanga Lille zawmtu Osimhen hian Pepe pheikhawk hnutchhiah chu zo taka inthawlhin French club tan hian match 38-ah goal 18-a khung a, Lille hian manto takin an hralh leh ta a ni. 

Nigeria tana vawi kua inlana goal li khung thei Osimhen hian France-a a season hmasa berah Lille's player of the season chawimawina a dawng a, Ligue 1 team of the season-ah a tel bawk. FIFA Under 17 World Cup 2015-ah khan ram tan a hming a chher a, Nigeria chu he inelnaah hian champion puiin Golden Boot leh Silver Ball-a dawng a ni. Hetihlaia kum 16 mi Osimhen hian Nigeria match zawng zawngah goal a khung vek a, hei hi FIFA Under 17 World Cup record a ni - Africa Youth Player of the Year-ah thlan a ni bawk. 

Kum 17 hnuai lam World Cup-a a hming a chher hnu hian VfL Wolfsburg a zawm a, Bundesliga club-ah hliam vangin beisei a phak lo. Belgian club Charleroi-ah loan-a kaltir a ni a, match 36-ah goal 20 a khung. Charleroi-in a ngheta an lakluh hnuah Lille an lo lang a, kum 21 mi striker hian French club hi a zawm - a tawpa vannei ber chu Lille an ni.