Scottish Premiership an khel ṭan leh ta

European football-a inelna ngaihven hlawh pawl ni phak Scottish Premiership 2020-21 season chu Inrinni zan khan khelh ṭan a ni leh der tawh a, match hmasa berah Rangers chuan team ṭha Aberdeen chu 1-0 in an hneh. 

May thla khan Covid-19 vangin Scottish Premiership hi tihtawp a ni a, Celtic chu points-per-game hmanga chhut a nih hnuin champion-ah puan an ni - August a thlen meuh chuan season an ṭan fel leh der ta. Steven Gerrard-a enkawl Rangers tan hian Liverpool aṭanga an lakluh Ryan Kent chuan minute 21-naah Alfredo Morelos-a siamsak chu goal hmahruai ni turin a khung a, goal dang a luh loh avangin 1-0 in Rangers an chak. 

Liverpool captain hlui Gerrard-a enkawlna hnuaiah Rangers hian season hnih chu a zawnin league-ah pahnihna dinhmun an luah a, Europa League hial a khelhpui leh tawh - tun season-ah erawh nomawi hmuh an duh tawh ang. 

Gerrard chuan, "Kan match hmasa berah, khualmualah Aberdeen kan hmachhawn dawn avangin point hloh tura ngaih kan ni. Aberdeen khan an khel ṭha em em a, goal chhuah loa point thum kan neih avangin kan lawm a ni. Hei hi kan bul ṭanna a ni a, thamral mai kan tum lo ang," tiin a sawi.