Mizoramin Saudi Arabia tlawh dawn lo

Santosh Trophy aṭangin Mizoram an tla. Mizoram hian group match hnuhnung bera Kerala an hneh loh avangin group dang result-ah an innnghat a, nimin tlai inkhelah Punjab-in Manipur an hneh avangin coach Samson Ramengmawia hote beiseina a tawp - point 12 hmu state pali zingah goal difference-ah hniam berin Mizoram hi an tla.

Manipur hi chak lo mah se pahnihna ni chungin an tling a, Mizoram erawh point vang pawh ni lo - goal difference vangin an tla.

Final round-ah hian team 12 an awm a, group pahnihah paruk ve vea ṭhen niin a sang pahnihin semifinal an khel dawn. Knockout stage chin hi Saudi Arabia-ah khelh tur a ni a, Mizoram erawhin Saudi Arabia an tlawh thei dawn lo.

Penalty

Mizoram hian final round lut turin Manipur puihna an mamawh a, Aizawl FC coach hlui Gift Raikhan hote hian Punjab laka point an hmuh hrim hrim chuan Mizoram an tling dawn.

Khuman Lampak Main Stadium-ah Punjab tan Parmjit Singh-a'n minute 12-na lekah penalty aṭangin a khung a, mualneitu lakah an goal khat hi an humhim - vanneih ṭum ni se goal dang pawh khung belh thei an ni.

Manipur right back Maibam chuan Punjab midfielder Sandeep a inbumtir hnuah ṭul lo takin box chhungah chiah a pet a, penalty a chawi. Manipur defender hian player pahnihin an la venpui chungin ṭul lo takin penalty a chawi - hei hi team pahnih danglamna leh Mizoram tlak chhan chu a ni.

Dem tur a awm lo

Mizoram hi champion lai Kerala nen group khatah an awm a, an group-a hmahruaitu an nih lo hi zahna tur a awm lo. Amaherawhchu, Kerala laka 5-1 ngawta chak loh erawh mualphona a ni a, inkhelh hmaa goal difference +10 chu +6 ah a tla thla.

Tun ṭum inelnaah hian pahnihna zinga a tiṭha pathum tan final round luhna kawng a inhawng. Mizoramin goal khung an harsat a, Kerala-in match ngaah goal 24 an khung theih laiin Mizoram hian goal 14 chauh an khung thei a, an pahnih inkhelhna pawh hi dah ṭha ila Kerala hian goal 19 an la khung pha tho.

Mizoram hi pahnihna zinga a tiṭha pathum zinga awm turin an dinhmun a ṭha tawk lo. Karnataka-in goal 21 khungin goal nga chauh an chhuah a, Maharashtra-in goal 13 khung mah se goal thum chauh an chhuah.

Manipur pawhin goal 16 an khung a, goal ruk an chhuah a, Mizoram erawhin goal riat zet an chhuah. Mizoram tan Manipur dem theih a ni lo a, an tihtur an tih loh avanga final round tling zo lo an ni.

Point 12 hmu Karnataka, Manipur, Maharashtra leh Mizoram zinga goal difference chhe ber Mizoram hi an tla.