Arsenal player thar Jorginho

Premier League hmahruaitu Arsenal chuan Chelsea aṭangin Jorginho an lalut. Italy midfielder hi pound maktaduai 12 man a ni a, kum 2024 thleng daih contract ziakin kum khat chhung atana pawh sei leh theih tura tih a ni bawk.

Kum 31 mi Jorginho hian 2014 khan Napoli aṭangin Chelsea hi a zawm. Blues tana a contract neih lai hi kumin nipuia zo tur a ni; Stamford Bridge-a cham zel ai chuan North London lam pan a thlang ta zawk a ni.

Nimin tlai khan Arsenal leh Chelsea hian inremna an ti fel a, nizan khan Jorginho hian medical test a nei zui, chanchinbu i chhiar chuan Gunners player thar a ni fel hman tawh ngei ang.

Mikel Arteta-a'n midfield thuam chak a duh, Brighton aṭangin Moises Caicedo lakluh an tum viau. Mahse, Premier League season hmang ṭha tak Brighton hian tun thlasik bazarah chuan Caicedo an chhuahtir phal lo, sum tam tak pawh an hnar.

Brighton aṭang hian pound maktaduai 21 sengin Belgium international Leandro Trossard an lo lalut tawh a, Poland defender Jakub Kiwior chu Spezia aṭangin pound maktaduai 17.6-in an lalut fel tawh bawk.

Arsenal hian FA Cup-ah Manchester City an hneh lo hlim a ni a, an chak loh ṭum hian midfielder Thomas Partey a inhliam. Ghana international hi hliam na tak ni lo mah se elpui tur leh a hmunruak luah thei tur an mamawh.

Jorginho hian Chelsea tan match 213 aṭangin goal 29 a khung tawh a, English club tan hian Champions League, Europa League, Uefa Super Cup leh Club World Cup te a chawi tawh.

An ram Italy tan pawh match 46 khel tawhin Euro 2020 a champion pui tawh a, kum 31 mi midfielder hian tawnhriat a ngah tawh hle. Season chawhnu lam hmang ṭan tur Arsenal tan hmanraw pawimawh a nih theih ngei a rinawm.