Joao Cancelo-a'n Bayern Munich a pan!

Bayern Munich chuan Manchester City defender Joao Cancelo chu loan hmangin an lalut a, club pahnih inremnaah hian pound maktaduai 61.5 (€70m, $76.3m) a lei ngheh theih dan a awm bawk. German club hian hun rei tak chhung Cancelo hi an enthlak tawh a nih avangin Pep Guardiola nena inhmu thiam lo Portuguese defender an lalut thei hi chanchin lawmawm a ni.

Cancelo hi player satliah a ni lo a, season liam taa Man City champion ṭum khan match 36-ah a inlan. Season hnuhnung pahnihah Cancelo hi PFA Premier League Team of the Year atan thlan ve ve a ni a, a record thlirin a theihna san zia a lan a, khelmualah a thiamzia a lang chiang lehzual.

Kum 28 mi Cancelo hian Man City-ah hian kum 2027 thleng contract a nei a, manager Pep nena inhmu thiam lo nia sawi a nih avangin a contract a hman zawh hi a rinawm ta lo. World Cup zawh hnuah Pep-a'n Cancelo ai hian City academy chhuak Rico Lewis bakah Nathan Ake, John Stones leh Kyle Walker te a ring zawk.

Man City ṭantuten Cancelo chhuak hi mak an ti a, amaherawhchu manager Pep hi kalphung nghet tak nei a nih avangin Spanish manager hnuaiah chuan hetiang hi thil thleng thei a ni. Pep-a'n Barcelona a enkawl ṭantirh khan Ronaldinho meuh pawh a chhuahtir nghal a, thutlukna danglam hi a lo siam tawh ṭhin tih hriat a ṭha. Tun ṭumah hian Erling Haaland an neih thar avangin Pep-a'n an khelh dan a thlak danglam hret a, Cancelo-a'n a tawrh phah.

Bayern Munich tan erawh chanchin lawmawm a ni a, Bavarians hian kuminah chak hmel an la hmuh loh avangin an hnuaia awm Union Berlin, RB Leipzig, Borussia Dortmund leh Freiburg te nen an inhnaih tawh hle. Hei chauh hi a ni lo a, German club hian Cancelo hi hun rei tak chhung an lo enthla tawh a ni.

Kum 2019 khan Bayern hian Cancelo hi lak tumin hma an lo la tawh a, amaherawhchu Portuguese defender hian Man City a pan ta zawk. German chanchinbu lar Bild-in nikum lam khan Cancelo hi Nagelsmann-a player lak duh zinga mi niin an lo tarlang tawh.

Bavarians hian tlarhnungah buaina an nei hrim hrim a, kumina match thum an khelh tawhah clean sheet an la nei lo. Ajax aṭanga an lakluh Noussair Mazraoui chu Covid-19 a kai hnuah lung lamah harsatna a tawk a, kar riat vel tal a chawlh a ṭul dawn.

Tun hma zawnga dinglama rinrawl Benjamin Pavard-a'n Allianz Arena-a cham reng a tum lo a, a ṭawngka hmangin chhuah a hreh lo tih a lang. Club academy chhuak Josip Stanisic lah rinrawla hman tlak a la ni chiah lo a, awlsam takin Cancelo hi dinglamah hmun a chang thei ang.

Cancelo hi ding leh vei lama khel thei a ni a, Bayern hian vei lamah Alphonso Davies an neih avangin Portuguese wing back tan vei lama bul ṭan nghal erawh a harsa thung ang. Bayern Munich hian February 1, Nilaini zan dar 1:15 hian DFB Pokal round of 16-ah Mainz an hmachhawn dawn a, kartawpah Wolfburg an tlawh leh dawn. Cancelo hian a club thar tana bul ṭan turin hun rei a nghah a ngai dawn lo.

Bayern player thar Cancelo chuan, "Bayern hi club ropui a ni a, khawvel club ṭha ber zinga mi an ni. Player ṭha bik an neih avangin ka phur a, Bayern tan ka theihna zawng zawng ka chhuah ang," tiin a sawi.

Engvangin nge Cancelo a chhuah?

Wing back hmuhnawm ber zinga mi Joao Cancelo-a'n Manchester City a chhuahsan hian football khawvel a barakhaih hle. Pep Guardiola leh Cancelo te hi an hmu thiam lo a, Portuguese defender-in Eithad Stadium a chhuahsanna chhan chu a ni ber.

FIFA World Cup-ah khan Cancelo hi group match-ah bul a ṭan vek a, last 16-a Portugal-in 6-1 zeta Switzerland an sawp khan bench-ah a ṭhu tluan. Bench-ah Cristiano Ronaldo a awm ve avangin Cancelo-a'n inkhel bul a ṭan lo hi a langsar lo a, quarterfinal-a Morocco an hneh loh ṭum khan bench aṭangin a lut thung.

Portugal coach kal chhuak ta Fernando Santos khan vei lama khelah Cancelo aiin Borussia Dortmund wing back Raphael Guerreiro a ring zawk. Chutihrualin Cancelo hi ding lamah chhawr theih a ni a, Santos pawh hian inelna ṭantirh lamah dinglamah chhawr mah se Manchester United wing back Diogo Dalot-a'n a nek chhuak leh ta bawk.

Cancelo hi World Cup hmain City player pawimawh a ni a, Qatar-a inelna zawh hnuah erawh hmun pawimawh a chang pha ta lo. Liverpool nen League Cup round 4 an khelh ṭumin Cancelo hi bench-ah a ṭhu tluan.

A hunlai chuan League Cup a nih avangin Cancelo hi Pep-a'n hahdamna hun a peah ngaih theih mah se Leeds United nen hun tawp lam minute 22 chauh a khel a, Everton lakah bench-ah a ṭhu tluan leh bawk.

Chelsea a hmachhawn ṭumin Cancelo hian bul ṭan mah se halftime-ah goal la luh hmain an thlak. FA Cup-ah City-in Chelsea an hmachhawn lehnghal a, second half minute 31 chauh a inlan.

Pep-a'n Cancelo hi khelhna hun a rawn siam a, Southampton (League Cup quarterfinal) leh Mnachester United (league) lakah bul ṭan ve vein minute 90 khel ve ve mah se an chak lo ve ve. Hemi hnu hian City-in league-ah Tottenham leh Wolves an hmachhawn a, FA Cup-ah Arsenal an hmachhawn bawk - Cancelo hi bench-ah a ṭhu tluan vek.

Arsenal an hneh ṭum hian right back-ah hian rawlthar Rico Lewis a awm a, left back-ah Nathan Ake a awm. Dutch defender Ake hian goal awmchhun a khung a, inkhelh banah Pep-a'n thu awmze nei a sawi.

City boss Pep Guardiola chuan, "Kan lawm. Dressing room-a player zawng zawngin an lawm vek ka ring a, pakhat erawhin a lawmpui lo maithei," tiin a sawi a, hetia Cancelo-a'n Allianz Arena a pan takah chuan Spanish manager thusawi awmzia hi a hriatthiam theih.

Guardiola chuan, "Tawnhriat kan nghah zel a, training-na leh hmun danga player-te chet dan nasa takin ka thlir. Kan rilru put hmang a dik loh chuan a khelh ṭhat theih loh. A chang chuan player-te hi an lawm dan a zirin ka thlang ṭhin. An theihna thlir chuan an thiamzia ka hre vek. A chang chuan player ṭhenkhat rilru put hmang a dik lo a, chu chuan hna a ti harsa ṭhin," tiin a sawi zui bawk.

Khawthlang media-te chuan Pep leh Cancelo te hi Arsenal nena an inkhelh hmain training-naah an inhmu thiam lo niin an sawi. Spanish manager hian Cancelo hi bul a ṭan loh tur thu a hrilh a, Porutugese defender hian thinrim takin a chhanglet - chhuah a duh thu a hrilh. Pep-a'n a duh ang ngeiin Cancelo hi January transfer chhung ngeiin a chhuahtir nghal a, City boss hian team chhungah player lungawi lo kawl
a tum lo.