Oldham Athletic enkawl tur Kewell

Liverpool leh Leeds United winger hlui Harry Kewell chu League Two club Oldham Athletic chuan an coach ni turin an lalut a, Zirtawpnia ban tak Dino Maamria hmun ruak a luah dawn a ni. 

Kewell hi League Two lamah a mikhual hran lo. English fourth division inelnaah hian Crawley Town leh Notts County-a lo enkawl tawh a, mahse Notts County hian kar 10 chauh hun a hmang hman tihin November 2018 khan an ban a ni. 

Oldham Athletic hian Covid-19 vanga League Two tihtawp takah khan 19-na dinhmun luahin season an khar a, Australia international hlui hnuaiah result ṭha zawk an beisei ang. Kewell chuan, "He club ṭantu, neitu leh keimah thlengin kan duh ber chu he club-in hma a sawn hi a ni a, he beiseina kan neih chhan pawh hi club-in theihna sang tak a nei tih kan hriat vang a ni," a ti. 

Liverpool tana Champions League nomawi lo chawi tawh Kewell hian coach hna a chelh hmasak berah Crawley Town chu League Two-ah 14-na a nihpui a, Notts County lamah insawn zui mah se match 14 hnuah an ban. 

Football agent hna thawk ṭhin Abdallah Lemsagam-a'n kum 2018-a Oldham a lei hnuah coach vawi sarih ngawt an thlak tawh a, Kewell hian a daih rei dawn leh dawn loh a hriat bik loh.