NE Open-ah Dindina leh Jojo champion

Badminton inelnaah Mizo hming a mawi leh ta - 3rd NE Junior Open Prize Money Badminton Tournament 2023-ah Laldintluanga Tlau leh Joseph VL Ringngheta te chuan champion nomawi an hlawh chhuak.

Tezpur, Assam-a neih inelna hi kum 21 hnuai lam inelna a ni a, Republic Vengthlang rawlthar Dindina leh Kulikawn rawlthar Jojo te hi doubles category-ah an champion - Mizo rawlthar pahnih hian final-ah seeded pakhatna Kayin Domint leh Dai Weshi, Arunachal Pradesh te chu straight set, 21-15, 21-12 in an hneh a ni.

NE Junior Open hi North East Sports Foundation ten an buatsaih a ni a, champion nomawi rawn hawntu Dindina hi Bawngkawn Badminton Club tana khel lai mek niin, Jojo hi Ralte Villa Badminton Club tan a khel thung.

Mizoram Badminton Association chuan thuchhuah siamin, an player pahnih Dindina leh Jojo-a te an champion thei chu an lawmpui thu an sawi a, an hmalam hun atan duhsakna an hlan bawk.