Lionel Messi leh World Cup Lunglên

“Pathianin ka tan rem a ruatsa a, hetiang ang ema hlimna leh lawmna dang hi chu dil belh tur ka nei tawh lo..." tiin Lionel Messi chuan World Cup champion an nih chungchang a sawi a, champion an lawmna leh an kalkawnga an thil tih ṭhenkhatah erawh a inchhir tih a sawi bawk.

Argentina captain hian Qatar World Cup an chawi hnua a vawi khat nan interview a nei - Argentina Urbana Play Radio Station hnenah a inbun ruak a, legend fam ta Diego Maradona a ngaih thu a sawi chhuak bawk a ni.

A harsa asin...

World Cup champion tura rinkai ni chungin Qatar ram an pan a, mikhual an nih chhunga an sa ei tur thlengin thlawhtheihna hmangin an phur lut, khelmual chhung bakah a pawn lam thlengin inbuatsaihna an nei ṭha tawk tih a chiang.

Match hmasa berah Saudi Arabia an hmachhawn a, captain Messi-a'n goal a khung nghal - an phurna chu sang tak a ni. Mahse, an group-a team nem ber tura ngaih hian South American ram hi 2-1 in an hneh let daih!

Messi leh a ṭhianten match hnihnaah Mexico an hmachhawn. Messi chuan, "A nihna tak sawi chuan World Cup match hoah kha chuan Mexico nen kan inkhelh kha a harsa ber a ni hial ang, engkim mai kha tihsual palh chuan a pawi thui thei," a ti.

Chak loh chuan tla thei dinhmunah an ding a, he inkhelah hian Messi chuan hla zet aṭangin goal ropui a khung a, an ram hi hnehna chanpuiin group stage an paltlang zui - North America ram lakah khan point hloh ni se an zinkawng a thui lo ang.

Boruak a sang

Inelna boruak a sang a, quarterfinal-a Netherlands nen an inkhelh dawn phei chuan khelmual pawn lama inbeihna pawh a nasa tawh hle. Dutch team manager Louis van Gaal chuan, "Argentina aiin kan inbuatsaih ṭha zawk, chak tura rinkai kan ni.

"Kan intawn hmasak khan Lionel Messi hian ball pawh a tawk lo," tiin 2014 World Cup boruak chungchang a sawi chhuak, he thu hi Argentine player ṭhenkhat chuan Messi hi an lo hrilh chhawng leh a, inkhelh banah Messi hian a thungrul.

Argentina hian Netherlands lakah 2-0 in hma an hruai a, nuamsa taka chak tura ngaih an ni. Mahse, Dutch team lamin substitute Wougt Weghorst-a goal hnih hmangin an sut zo leh vek a, penalty shoout hmangin Argentina an vannei hram.

Inkhelh laklawh laiin ram pahnih player ten buaina an nei fo a, khelmual sir aṭanga player ṭhenkhat rawn tlan lut hak hmuh tur pawh an awm, hun tawp hma dehin Netherlands defender Denzel Dunfies chu hnawhchhuah a ngai hial.

A inchhir

Inkhel a tawp a, Argentina player ṭhenkhat chuan an chak lawm nan Netherlands player an ti el a, hei hi media lamah chiang takin a lang. Messi pawh a bang chuang lo, khelmual sira Dutch coach Van Gaal hmaah dingin, a kut pahnihin a beng a dawm.

Messi chuan, "Ka thil tih kha a dik lo, khatianga tichhunzawm tur kha chu ka ni lo. Inkhel boruak kha a sang a, engkim mai kha a rawn thleng thut thut a ni ber mai a, phurna, hlauhna leh lawmna te kha a indawtin a rawn thleng zut zut.

"Lawmna leh thinrimna kha a inchawhpawlh nuaih a ni ber a, kei ngei pawh khan awmdan tur ka thiam tawk lo. Hetiang thil mawi lo hnutchhiah hi ka duh ngai lo, mah se a lo thleng miau mai si. Kha thil kha chu a boruakin a rawn ken tel a ni," a ti.

Qatar World Cup bakah 2014 Brazil World Cup-ah khan Argentina hian Messi hoin final an thleng, heng tournament pahnihah hian an kalkawngah Van Gaal enkawl Netherlands hi penalty hmang ve vein an pet chhuak a ni.

Duhsakna a dawng

World Cup ṭan hma aṭangin Lionel Messi leh Argentina boruak a lian. La Albiceleste hian Messi an neih vang chu ni bawk mah se, coach Lionel Scaloni kaihhruaina hnuaia an khelh ṭhat tluan vang a ni bawk.

Khawvel ram hrang hrang aṭangin Messi chu World Cup champion tura duhsakna thawm a ri ring. India pawh kan bang lo, hei lai Mizoram aṭang ngei pawhin Messi leh Argentina thlawptu an tam a, an thawm a ṭha hle.

Messi chuan, "Mi zawng zawngin anmahni ram kha champion turin an duh. Mahse, an ram an tlak hnu khan mak tak maiin Argentina an rawn ṭan zel a, champion tur khan min duhsak em em vek ni ber maiin ka hria.

"Mitin mai khan duhsakna thu min hlan a, ka sawi chhawng leh vek thiam tawh lo zawk. Khatiang ang zo zai duhsakna thu khan min tichak a, hlawhtlinna kan chan theih nan pawh chakna nasa tak min siamsak," a ti.

Hlawhtlinna

Messi hian World Cup vawi nga a khel tling tawh a, 2014 World Cup final-ah khan Germany an hneh lo. Copa America final a luh hmasak pathumah pawh a chak lo lamah a ṭang vek, a hun hmasa lam a awlsam bik lo hle.

Mahse, 2021 khan Copa America final-ah Brazil hnehin an champion a, nikum tawp lamah France hnehin World Cup an chawi leh bawk. A tan chuan a hun hnuhnung lama a hlawhtlinna chan hi a hlu zual bik ngei ang.

Messi chuan, "Final kan khelh hmasak hoah chak lo mah ila, a tawpah chuan Pathianin kan tana rem a lo ruat hun chu a lo thleng ve mai. Copa America leh World Cup kan chawi hi a hlu a, ni tin hian lawmthu ka la sawi ṭhin.

"Final-a chak lo zawk kan nih tawhnaah khan, keimah chauh ni loin ka chhungte pawhin an tuar ṭhin. Ka khelh dan leh hun tawnah sawiselna nasa tak ka tawk ṭhin bawk. Tunah chuan sawiselna kan thawh ṭhinte pawh a bo tawh ang," tiin a sawi.

Maradona a hre reng

Diego Maradona hoin Argentina hian 1986 khan World Cup nomawi an chawi. Mexico rama an thil tih ropui avang hian Maradona an ngaihsanna a zual a, a hnu lamah chuan Messi hi an ram champion pui leh thei hmasa ber a ni.

Maradona hi November 25, 2020 khan lungphu chawl vangin a thi, nghakhlel taka an ramin World Cup title an la leh lai thlir a tum chu a hmu hman ta lo. Hlawhtlinna ropui an chan niah pawh an legend hi an theihnghilh chuang bik lo.

Argentina captain Messi chuan, "Theih ni se chuan Diego Maradona khan champion nomawi min hlan se, amah leh Argentine mipui duhthusam a ni ngei ang. Van aṭangin min lo thlir ve ngeiin ka ring a, chu chuan chakna leh chhelna pawh min pe," a ti.

Football inelna ngaihhlut berah Argentina hi vawi thum an champion ta a, an champion vawi hnih hi an legend pahnih Maradona leh Messi te hunlai ve ve a nih avangin ram mipui tan chuan a hlut dan pawh a danglam ngeiin a rinawm.

Ram mipui chu

An nghak a, an beisei a, a thleng dawn lo emaw an tih hnuah Lionel Messi hoin Argentina an champion a, khawvel mipuiin an lawmpui - Argentine mipui tana a lawmawm dan tur phei chu sawifiah phak a ni lo.

Qatar aṭanga Argentina ram an haw khan, mipui maktaduai nga chungin Argentina team hi an lo hmuak. An khawpui Buenos Aires kawtthler lian lai khat tlatin an pungkhawm a, hlimna leh lawmna authawm a ring hle.

Messi chuan, "Mipui hmelah lawmna ka hmu, puitling chauh ni loin naupang, a lian aṭanga a te ber thlengin an hlim tih ka hmuh khan a ropui ka ti, thil mak tak chu mipui nuaih tam tak pungkhawm an hlim vek a, an intibuai miah lo kha a mak zawk.

"Kawtthlera leng lote pawhin remchang lai lai an dap a, player chuanna Bus-a rawn lawn tum tawk pawh an awm, a ṭhen chuan leihlawn (bridge) aṭangin min lo chang hial," tiin an ram mipui hlimna chuan a tihhlim thu a sawi.

A la tawp lo

World Cup zawhah Messi-a'n Argentina tana inkhelh a chawlhsan dawn, tun ṭum hi ram tana a tournament hnuhnung ber a ni, tih chu media chaw tui ber pakhat a ni a, Vanglaini ngei pawhin he thu hi kan lo ziak fo tawh a ni.

Mahse, kum 35 mi Messi hian hlimna vawrtawp thlenpuitu an ram tana inkhelh zel a la châk, a chawlh thu a la sawi thei lo, "Khelh chhunzawm zel ka duh" tih chu a kam chhuak hnuhnung a ni ta zawk, coach Scaloni pawhin a tan hmun a awm thu a sawi ve bawk.

Messi chuan, "Hlenchhuah tur ang chu ka hlen chhuak kim ta, mimal thil pawh Barcelona lamah khan ka tlingtla tawh," tiin a football zinkawngah chuan hlawhtlinna chan theih ang a chang kim tih a sawi.

Barcelona tan La Liga nomawi 10 leh Champions League pali a chawi a, nomawi dang chawi theih dang zawng zawng pawh a chawi kim vek. Mimal chawimawina ngaihhlut Ballon d'Or pawh vawi sarih a dawng tawh, a vawi riat nan a dawng a nih pawhin a mak lo ang.