Everton manager thar Sean Dyche

Premier League club talbuai Everton chuan coach Frank Lampard an ban hnuah a thlaktu tur an nei ta a, Burnley boss hlui Sean Dyche chu an lalut - English coach hoin Premier League inhamtan chu an tum tur langsar a ni.

Kum 52 mi Dyche hian kum hnih leh a chanve chhung khel turin Everton hi a zawm a, June 2025 thleng chu Goodison Park-ah hun a hmang dawn tihna a ni - Everton fan-ten lawm tur nge, lawm loh tur hriatthiam an la harsat mai thei.

Dyche chuan, "Theihtawp chhuah ṭhin team din hi kan tum ber chu a ni a, a tawp thleng bei a, chhuang taka Everton jersey ha thei kan duh a ni," a ti a, theihtawp an chhuah tur thu a sawi.

February 2016-a Farhad Moshiri-a'n Everton a lei hnuah manager a thlak ngun tawh hle a, British-Iranian sumdawng hausa hnuaia Everton-in manager nghet an neih pasarihna a ni!

Hmabak hautak

Everton hi Premier League table-ah 19-na an ni mek a, tun season-a league match 20 an khelh tawhah vawi thum chiah la chak vein, vawi ruk draw an nei a, vawi 11 an tlawm tawh.

Relegation zone pawn chiaha awm chin, 17-na Wolverhampton Wanderers an phak lohna chu point hnih a ni a, table mawngphah luahtu Southampton nen an point hmuh zat a inang.

Coach atana Dyche an lakluh hnua an match hmasa ber chu February 4, Inrinni zan dar 6:00-ah Arsenal nen an khel dawn a, Premier League hmahruaitu hi Goodison Park-ah an lo mikhual dawn a ni.

Gunners nen an inkhelh zawhah, February 13, zan dar 1:30-ah match an nei leh dawn a, khualmualah Liverpool an lenchilh thung ang - Dyche-a hmabak a hautak takzet a, a match hmasa pahniha point hmuh miah lohna chance a awm!

Beiseina

Everton hmabak a hautak nghal a, mahse, coach thar Dyche tan beiseina neih loh a thiang lo. April, 2022-a Burnley coach a nihna aṭanga ban a nih hnua club la nei leh lo coach hian Everton tan beiseina sang tak a nei.

Dyche chuan, "Fan-ten he club an hmangaihzia ka hmuh hian kan inkar boruak pawh a ṭhat chhoh zel ka beisei. He squad-ah hian quality a awm a, mahse, chu chu mawi taka a vul theih nan tih tur kan nei a ni.

"Chu hna chu kei leh ka coaching staff-te thawh tur a ni," a ti a, Everton enkawl tura a chunga rinna nghah a ni chu a lawm thu a sawi - season tawp thleng lawm thei tak ang maw?

Dyche chuan, "Everton fan-ten he club tana rilru an sen nasatzia ka hria a, an tana he club hlutna pawh ka hria. Theihtawp chhuah a, an duh ang pe turin kan inpeih a ni," a ti a, Everton fan-te tan ngaihthlak a nuam ang.

A bul ṭanna

Dyche chuan, "Fan-te hlimna thlen tura a bul ṭanna chu thlan tui a ni a, Everton Football Club dinna kha kan hre reng tur a ni. Hlim taka awm leh kan duh a, chumi tur chuan fan-te kan mamawh.

"Thawhhona ṭha leh inlungrualna kan mamawh a, staff leh player aṭangin bul kan ṭan tur a ni," a ti - Dyche hi Nottingham Forest winger hlui Ian Woan chuan assistant manager niin a pui ang a, England international hlui Steve Stone chuan first team coach hna a chelh ang.

Everton chairman Bill Kenwright chuan, "Dyche hian Everton manager ropui tak ni turin theihna a neiah kan ngai a ni," a ti - English coach hian Burnley chu vawi hnih ngawt Premier League-ah a kaipui a, season hnih chu 10-na chunglam a nihpui.

Burnley hi Dyche kaihhruaina hnuaiah 2017-18 khan Premier League-ah pasarihna an ni a, Europa League playoff khel turin an inpettling. Kum 51 hnua European football an inlan leh hmasak ber a ni - Dyche tan hna a inṭan e!