PGMOL-in Liverpool vs Brighton-a an tihsual an pawm

Premier League-a referee intelkhawm pawl Professional Game Match Officials Limited (PGMOL) chuan Liverpool leh Brighton & Hove Albion inkhela an tihsual an pawm a, Brighton tan a ngeiawm khawp ang!

Pathianni zan khan FA Cup fourth round-ah Brighton leh Liverpool hi an inkhel a, Liverpool midfielder Fabinho chuan Brighton striker Evan Ferguson lakah hlauhawm takin tackle a nei.

Brazil international hian red card a hmuh ngei rin a nih laiin referee David Coote chuan yellow card chiah a phawrh a, video assistant referee hmangin ennawn pawh a ni lo.

PGMOL chuan Fabinho hian Ferguson-a tlawh hian, na takin tlawh lo mah se, a kerek chung lamah a tlawh avangin red card pekna tur nia an ngaih thu an sawi a, Coote-a'n red card a phawrh lo a nih pawhin, VAR inrawlh ngeina tur niin an sawi.

Referee ṭha inzawm-khawm pawl hian, lang tlang zawka an hnathawh kalpui an tum a, he an hmalakna chi khat atan hian Liverpool leh Brighton inkhela thil thleng pawh hi an ennawn a ni.

He thil thleng avang hian Ferguson hi lakchhuah a ngai a, he thu buatsaih a nih lai hian Brighton chuan an player dinhmun hi chiang taka sawina an la nei lo.

Mahse, Brighton hian hun pek belha Kaoru Mitoma-a goal hmangin Liverpool hi an hneh a, Reds tan Harvey Elliott chuan goal hmahruai khung mah se Lewis Dunk leh Mitoma hmanga chhangletin, 2-1 in an chak - referee thutlukna dik lo pawh a nat dan a na lo deuh ang.