Copa del Rey-ah El Clasico

Spanish football-a inelna ngaihhlut hlawh Copa del Rey semifinal-a inhmachhawn tur pawhna chu Thawhṭanni zan khan neih a ni a, Spanish Cup-ah hian Copa del Rey kan hmu dawn.

Semifinal lehlamah Athletic Bilbao leh Osasuna an intawng dawn thung a, Barca leh Real hian semifinal-a intawn hi an châk lo ve vein a rinawm!

Spanish football-a club inhal pahnih hi tun season-ah vawi hnih an intawng tawh a, vawi khat ve ve an chak - an inngam tawk ṭhin hle.

Real hian October 2022 khan La Liga-ah 3-1 in Barca hi an hneh a, Catalan club tan tun season league match-a an tlawm awmchhun a la ni reng rih.

Spanish Super Cup-ah erawh Barcelona hian 3-1 in Real Madrid hi an hneh ve thung a, La Liga-ah pawh inum ber niin, Copa del Rey-ah an intawng leh dawn ta - a hmuhnawm ang.

Barca hian Spanish Super Cup-a an chak ṭum hian Gavi, Robert Lewandowski leh Pedri hmangin goal an khung a, Real tana Karim Benzema khungin awmzia a nei phak lo - final-ah chakin, champion nomawi an chawi zui.

La Liga-ah pawh Barca hian match 18 ve ve khelhah, hma an hruai mek a, pahnihna Real Madrid ai hian point ngain an sang zawk mek. Spanish football-a champion theihna zawng zawnga Real nekchhuah hi an châk khawpin a rinawm.

Copa del Rey 2019-ah pawh khan team pahnih hi an lo intawng tawh a, inkhel pahnih belhkhawmah Barcelona hian 4-1 a hnehna changin final an lo lut tawh.

Ruahman dan chuan Copa del Rey semifinal first leg hi March 1 zanah khelh a ni ang a, second leg hi April 5 zanah khelh tur a ni ang - Barcelona hi Santiago Bernabeu-ah an leng hmasa dawn.