Chelsea-in Enzo an beisei

Thlasik transfer-a insum tum lek loa sum seng Chelsea chuan sum ṭhahnem tak an theh chhuak leh ta a, Benfica midfielder Enzo Fernandez chu pound maktaduai 105.6-in an dawr.

Nizan khan transfer bazar khar a ni a, he thuziak i chhiar meuh chuan Argentina international hian Chelsea a pan fel tawh hial ang - beisei anga thil a kaltluang a nih chuan Enzo transfer hi Premier League record a ni ang.

Premier League-a player man to ber ni mek chu Jack Grealish a ni a, English midfielder hi Manchester City chuan Aston Villa aṭangin pound maktaduai 100 ngawtin an lei chhuak a ni.

Argentina tana World Cup nomawi chawi hlim Enzo hi Qatar-a neih zawh tak World Cup-ah khan young player of the tournament atan thlan a ni a, match sarih khelin, goal khat a khung bakah, assist vawi khat a nei.

Benfica tan tun season inelna hrang hrangah match 29 khelin goal li a khung tawh a, assist vawi sarih a nei bawk - a nep lo hle.

Portuguese club Benfica hian Chelsea chu an hriat loha an player lo tih lunglen tumah an lo puh tawh a, mahse, tunah chuan boruak ṭha lote dah ṭhain, club pahnih an indawr ṭha leh a ni.

Argentine club ṭha River Plate aṭanga a professional career ṭantu Enzo hian August, 2022 khan River Plate aṭangin Benfica hi a pan ve chauh a, hetihlaia a man zat hi pound maktaduai 10 chauh a ni - Benfica tan chuan hlep hlang a ni ringawt!

Chelsea hian tun thlasik transfer-ah player an lalut nual tawh a, Enzo hma hian Lyon right back Malo Gusto (£30.7mtd), PSV Eindhoven winger Noni Madueke (£30mtd), Shakhtar Donetsk forward Mykhailo Mudryk (£89mtd), Molde striker David Datro Fofana (£8mtd -10mtd), Vasco da Gama midfielder Andrey Santos (?) leh AS Monaco defender Benoit Badiashile (£35mtd) te chu a nghetin an lalut tawh.

Mahse, Gusto erawhin season tawpah Stamford Bridge-a pan dawn chauh a, Atletico Madrid aṭangin Joao Felix chu loan-in an la bawk a, season tawp thleng loan-a hawh manah hian pound maktaduai 9.7 an seng!

London club hian nipui transfer-ah khan £270mtd an seng tawh a, Premier League transfer bazar vawi khata player lei nana inseng hnem ber record a ni - khawvel huapah chuan Real Madrid chiah an phak lo a, Madrid hian 2019 khan £292mtd an seng thung.