US Open khel lo tur Nick Kyrgios

Nick Kyrgios chuan US Open a khelh loh tur thu a ti chiang. Covid-19 vanga Grand Slam inlena ngaihhluta a inlan theih dawn loh avang hian hrehawm a tih thu a sawi chhuak.

Australian tlangval Kyrgios bakah hian hmeichhe world number 1 Ashleigh Barty chu kar hmasa khan a lo inhnukdawk tawh bawk, hard court inelna lian hi season danga a hlutna ang chu a phak dawn lo niin a lang. Kum 25 mi Kyrgios chuan, "Ngun takin ka ngaihtuah a, kei leh mipui himna leh hriselna ka ngaihpawimawh a ngai. Sum leh pai bakah tennis chu kan la chawi nung leh thei dawn a, nunna erawh kan nei let thei dawn si lo," tiin nunna a ngaih pawimawh thu a sawi.

World number 40 chuan sawi zawmin, "Arthur Ashe Stadium hi khawvela infiamna hmupui ropui zinga mi a ni, kumina ka inkhel ve thei lo tur hi a pawi ka ti takzet. Chutih rualin mi tam takin an thih pui tawh lakah ka nunna thap ve ngawt chu ka duh lo," a ti. United States Tennis Association (USTA) chuan season tira an ruahman angin August 31 aṭangin US Open chu New York khawpuiah an khel dawn, a hmuna entu erawh an awm lo ang. Tun thlatir khan Kyrgios chuan USTA hi mahni hmasial tiin inelna an kalpui tum dan a lo sawisel tawh bawk.