England sorkarin football tan kawng an sial

England sorkar chuan June thlaa professional football khelh ṭan a nih theih nan kawng an hawn thu an puang.

Ningani khan sports secretary Oliver Dowden chuan Football Association, Premier League leh English Football League te a kawm a, inelna ṭan tura hma an sawn zel thu a sawi.

Dowden chuan, "Player, coach leh staff-te hriselna kan ngai pawimawh a, a him a nih chuan inelna chhunzawm pawh kan duh tlang. Tunah chuan football thuneitute kutah a innghat tawh a, ruahmanna siam ang an pawm tlan a la ngai. 

"Fans, football community leh ram tana ṭha turin hma an lak a ṭul. Sorkar leh medical lama mithiamte chuan puih an ṭulnaa pui turin an inpeih reng," tiin sorkar lam chuan inelna kalpui an phalsak thu a sawi.

England-ah football hi sumdawnna lian tak a ni a, player tan chauh ni loin a chheh vela hnathawk tan pawh ei bel ber a tling. Sports secretary Dowden chuan, "Football inelna ṭan a nih hian football chhungkua leh a chhehvela mite tana sum thawhchhuah dan tur an ngaihtuah tel a ṭul dawn a ni," tiin inelna ṭan an phal chhan a sawifiah.

England-a deputy chief medical officer Jonathan Van-Tam chuan inelna ṭan tur chuan muang mara ngaihtuah a ṭul thu leh invenna uluk a ṭul tur thu a sawi ve thung.

Jonathan chuan, "Thil te reuh te teah pawh fimkhur vek a ṭul, awmze neia rahbi siam a ngai. A pawimawh hmasa ber chu social distancing zawm si a, him taka training neih a ni. Inelna ṭan hmain training aṭanga thil thlen dan kan zir chian hmasak phawt a ṭul dawn," tiin a sawi.

Player-te hian mimal ang chuan training an nei ṭhin a, Ṭhawhṭanni aṭangin group angin training an ṭan dawn. Chutihrualin training ṭan hunah hian minute 75 chiah training an nei thei a, group hrang hrangah inṭhenin social distancing an zawm a ṭul bawk.

Tunkar Thawhṭanni khan Premier League club-te 'Project Restart' chungchang sawiin an ṭhu khawm a, June 12 hian inelna ṭan theih an inbeisei. Tun Ṭhawhṭanni hian Premier League club-te hi an inhmu khawm leh dawn a, hemi a thlen meuh chuan Bundesliga-ah chuan inelna ṭan a ni tawh ang.

Premier League club hi March 13 aṭangin Covid-19 vangin chawlh a ni tawh a, team tam zawkin match kua khelh tur an la nei. May thla ṭantirh khan Brighton player pathum chuan Covid-19 an vei tih hmuhchhuah a ni a, manager Graham Potter pawhin inelna ṭan a huphurh phah hle.

Seagulls manager Potter chuan, "Kan hun tawn mek leh kan dinhmun hi hriatthiam har tak a ni. Ni tin hian a danglam zel a, kan chhehvel kan thian fai. Player-te chin hriat vek sen a ni lo a, a him thei ang bera ruahmanna siam a ni chungin ngaih ngam taka awm a har. Chhungkua kan nei a, mihring ve tho kan ni," tiin a hlauhthawn thu a sawi.

Football kalphung pangngaiah chuan June 30-ah season a tawp ṭhin a, tun season-ah erawh Covid-19 vangin a danglam a ṭul dawn. Premier League chuan thutlukna siamin contract pawhsei dan tur rem a ruat.

Club leh player-te'n contract pawtsei turin June 23 thleng inremna an siam thei dawn a, an contract pawhsei hian tun season tawp rualin a tawp ve nghal ang.

Premier League chief executive Richard Masters chuan, "Club-te hian season ṭantirha an squad ang thoa inlena an zawh theih kan duhsak," tiin a sawi.