Eddie Howe-a'n Bournemouth a chhuahsan

Bournemouth manager Eddie Howe chuan Premier League aṭanga Cherries a tlakpui hnuah inhriatthiam tawnnain a chhuahsan a, kum 42 mi manager awm zel dan tur hi hriat a châkawm ta hle. 

Howe chuan, "Player leh coach ka nihna anga kum 25 hun kan hman ho hnuah he club chhuahsan a ngai ta hi hrehawm ka ti a, club nena thutlukna kan siam hi thutlukna ka siam tawha la harsa ber a ni. "Mahse, he club ka hmangaihna leh ngainatna te chu a ngai reng ni dawn mah se club-in chona thar hmachhawna mi thar a neih hun niin kan hria a ni.Ka thinlungah he club hi a cham reng dawn a, mahse tun hi inthlak danglam hun chu a ni," tiin a chhuah chhan a sawi.

Howe enkawlna hnuaiah Bournemouth hian League Two aṭangin Premier League club pangngai tak ni turin an inhlangkai a, season ruk chhungin vawi thum promotion a hmuhpui hman a ni. English coach ṭhangduang Howe hian Bournemouth hi Premier League-ah season nga zet hun a hmanpui a, mahse tun season league-ah khan match 38-ah vawi 22 a tlawmpui a, Championship lamah a tlakpui leh ta a ni. Howe hian vanduaina pakhat a nei a, Cherries tana sum a hman hnemna ten beisei an phak ṭhin lo. Kum 2016 khan Reds forward Jordon Ibe chu pound maktaduai 15-in a lei a, mahse season hman zawh takah khan league match hnih chiah a khel. 

Kum 2019 khan Liverpool striker ṭhangduang  Dominic Solanke chu pound maktaduai 19-in a lalut a, mahse league match 32-ah goal thum chiah a khung. Hliamin Cherries hi a tibuai bawk - kum 33 mi defender tawnhriat ngah Charlie Daniels chu August 2019 khan hliam vanga season tluan a inkhelh theih loh tur thu tihchian a ni a, player beiseiawm David Brooks chu vawi hnih zai a ngaih avangin season tluanin a inkhel meuh lo bawk.