Premier League player man to ber Enzo; Chelsea thlasik bazarna zat £280m chuang

Thlasik bazar tawp zanah Chelsea-in Enzo Fernandes chu Benfica aṭangin Premier League player manto ber ni turin an lalut. 2022 FIFA World Cup young player of the year Enzo man hi euro maktaduai 121 (£106.8m) a ni. Enzo hian London club tan June 2031 thleng contract a ziak.

Kum 22 mi Enzo hian Manchester City-in kum 2021-a Jack Grealish an leina pound maktaduai 100 chu a khum. Nikum August thla khan Argentine midfielder hian pound maktaduai 10-in River Plate aṭangin Benfica a zawm a, World Cup khelh ṭhat vangin kum chanve chhung lekin a man hi a let 10 chuangin a pung.

British record fee

Alan Shearer-a'n Blackburn an champion zawh a, Newcastle United a zawm khan Premier League player manto ber a ni a, English striker man hi pound maktaduai 15 niin British record fee a ni.

England captain hlui Shearer hian July 1992-a Southampton aṭanga Blackburn a zawmna pound maktaduai 3.6 pawh record a ni pha tawh bawk. Shearer-a record hi Rio Ferdinand-a'n (£18m) West Ham aṭanga Leeds a zawm khan a rawn khum a; Man United-in Ruud van Nistelrooy (£19m) leh Juan Sebastian Veron (£28.1m) te an lakluh khan a rawn khum leh bawk.

Man United-in che ṭha turin sum an seng hnem tih a lang a, Leeds aṭanga Rio Ferdinand an lakluhna pound maktaduai 29.1 pawh kha British record a ni. Chelsea-in Roman Abramovich hoin sum an ngah chho a, AC Milan aṭangin Andriy Shevchenko (£30.6m) an lalut.

Manchester City hun a rawn thleng a, kum 2008 khan Robinho chu Real Madrid aṭangin pound maktaduai 32.5-in an lalut leh bawk. Chelsea-in an elpui Liverpool aṭangin Fernando Torres (£50m) an thlem chhuak thei a, Manchester United-in an player hlui Paul Pogba chu pound maktaduai 89 zetin Juventus aṭangin an lalet bawk.

Pogba-a record hian kum nga a daih a, kum 2021 khan Jack Grealish chuan a rawn khum. Man City-in Grealish hi pound maktaduai 100-in an lalut. Kum hnih pawh tling loah Chelsea-in British record fee-in Enzo Fernandes an lalut a, club neitu thar Todd Boehly a che na hle.

Tluk loh tlem a zawng

Chelsea-in Enzo an leina man hi a hun laia khawvel player manto ber Cristiano Ronaldo (£80m) leh Gareth Bale (£85.3m) ten Real Madrid an zawmna man aiin a to a zawk a, pawisa hlutna nasa takin tla hniam mah se Argentine midfielder hi man hi a tam thaw khat hle.

Khawvel huapa player manto lamah Enzo hi pasarihna a ni pha a, a tluk loh ho chu Neymar (£200m), Kylian Mbappe (£166m), Philippe Coutinho (£142m), Ousmane Dembele (£135m), Joao Felix (£113m) leh Antoine Griezmann (£107m) te chauh an ni.

Enzo Fernandez tluk loh ho player-te hi chu goal khung thei player hlir an ni a, defensive midfielder man ang zawnga chhut phei chuan Argentine midfielder man hi a to ṭalh ṭalh hle. Man United-in tawnhriat ngah zawk Casemiro lak nan pound maktauduai 70 an hmang. Chutihrualin Chelsea-in sum thehchhuah tur an nei miau a, Benfica-in an chelh ngam bawk a, London club leina zat hi a sang lo thei lo.

An lei dan chu

Chelsea-in nipui bazarah ringawt pound maktaduai 250 chuang player lei nan an hmang tawh a, an result a ṭhat chuang loh avangin January transfer-ah an che na hle. World Cup-a hming langsar Enzo hi thlasik bazar ṭantirh aṭangin Chelsea-in an rim ṭan tawh.

Amaherawhchu, Benfica-in Enzo hi nikum nipuia an laktirhin release clause-ah euro maktaduai 121 an ziahpui a, World Cup-ah Argentine midfielder hi a chet ṭhat avangin a hlutna nasa takin a pung. Season ṭantirha 'star' ni pha lo kha, World Cup vangin 'star' a ni tawh a, Benfica hian an chelh rei theih chuan a hlutna a pung zel dawn tih an hria.

Portuguese club hian chelh tumin theihtawp an chhuah a, Chelsea lamin tun ṭuma an lak loh chuan Europe club lian dang nen inchuh a ṭul ang tih an hlau ve bawk. Blues hian club neitu zinga mi Behdad Eghbali hoin Portuguese club hi an dawr a, transfer tawp ni hian darkar 12 chuang hun an hmang.

Transfer tawp hma darkar khat leh minute 45 a la awm tihin club pahnihin inremna an nei a, Blues hian kum riat leh chanve tan Enzo hi contract an ziahpui. London club hian a man hi installment-in an pe dawn a, vawi ruk pekah an hmang ang. River Plate pawh an vannei a, sell on clause an dah tel avangin 25% an chang dawn.

Sum hmang tam

Chelsea-in Enzo ringawt hi an lei lo a, tun season-ah ringawt hian player lei nan pound maktaduai 600 an hmang - Premier League club zingah an hmang tam lawrlak. Season liam ta khan Arsenal-in pound maktaduai 150.66 an hmang pha a, 2020/21 season-ah Chelsea bawk hian pound maktaduai 222.5 an hmang.

Kum 2019/20 season-ah Man United-in pound maktaduai £192.6 an hmang a, 2018/19 season-ah Liverpool-in pound maktaduai 165.45 an hmang. Season hnuhnung panga thlir chuan Chelsea sum hman hi a tam hem hem hle.

Chelsea hian a ngheta player ṭhahnem tak an lakluh bakah loan hmangin nikum nipui khan Denis Zakaria an lalut a, tun thlasik bazarah Joao Felix an lalut bawk. Player pahnih hi loan ni mah se an man belhkhawm chu pound maktaduai 12.4 a ni pha a, a ngheta player ṭha pangngai lak theihna tur a ni.

Blues hian February 3, Zirtawpni zanah Fulham an mikhual nghal dawn a, an inrem dan hriat a châkawm tawh hle. London club hian player inhliam nei mah se player an lakluh hnem avangin Graham Potter-a tan chhuanlam siam a thiang dawn tawh lo a, season thara Champions League khelh chu hlawhtlinna a ni thei ang.

Tun dinhmunah hian Chelsea hian match 20 aṭangin point 29 chauh an hmu a, table-ah 10-naah an awm mek. Champions League khel thei china awm Manchester United hian point 39 an hmu a, Chelsea aiin point 10-in an hmu tam zawk.