United an vannei: Eriksen ‘Out’, Sabitzer ‘In’

Transfer tawp niah Manchester United-in Christian Eriksen inhliam nat thu an puang a, Scott McTominay pawh kar hnih tal a chawlh a mamawh thu an puang tel bawk. Zan lamah erawh United-in chanchin ṭha an nei thung a, Bayern Munich aṭangin loan hmangin Marcel Sabitzer an lakluh thu an puang.

Kum 28 mi Sabitzer hian Bayern hi August 2021 khan zawmin match 54 a khelhsak tawh a, hmun pawimawh erawh a chang pha lo. Sabitzer chuan, "A chang chuan rang taka thutlukna siam ṭul chang a awm ṭhin. Man United zawm theihna remchang a awm tih ka hriat khan a tan hun ṭha tiin ka phur hle. Ka ṭhat vanglai tak a ni a, ka tawnhriat leh thahrui hi team tan a ṭangkai thei ang," tiin a sawi.

Sabitzer hi RB Leipzig aṭangin khawvelin an hria a, German club hi champion pui lo mah se a hnathawh erawh a ropui hle. Kum 2017 khan Austrian Footballer of the Year-ah thlan a ni a, kum 2019-20 khan Bundesliga chauh ni loin Champions League team of the season-ah a tel pha.

Leipzig-ah hian Sabitzer hi captain a ni a, midfield luahlumtu ni ringawt loin goal a khung thei tel. Leipzig-ah hian match 229 aṭangin goal 52 a khung a, assist vawi 42 a nei pha. Bayern-ah erawh hmun pawimawh a chang lo a, match 54-ah goal hnih khungin assist vawi hnih chauh a nei a ni.

Man United hian Sabitzer an lakchhan ber chu Eriksen inhliam vang leh McTominay-a'n chawlh rih a mamawh vang a ni a, Danish midfielder hi season tawp lamah chauh a inlan leh thei dawn. Sabitzer hi Eriksen anga ball fing pe thiam chu a ni kher lo ang a, mahse Danish midfielder aiin thahrui a ngah zawk bakah a tlan chak zawk thung ang.

Nizan khan Man United-in Nottingham Forest nen League Cup semifinal second leg an khel a, English club hian hnehna an chang a nih chuan Sabitzer hian a club thar hi nomawi chawipuina remchang a nei ang. Austrian midfielder hian Leipzig-a a awm lai hian loan hmangin Red Bull Salzburg tan a khel tawh a, Salzburg hi league leh cup-ah champion puiin match 57 aṭangin goal 27 a khungsak a ni.

Man United hian January transfer-ah Sabitzer bakah loan hmang thoin keeper Jack Butland leh striker Wout Weghorst te an lalut a, chutihrualin nipui bazarah Tyrell Malacia (£12.9m), Christian Eriksen (free), Lisandro Martinez (£47m), Casemiro (£70m), Antony (£86.5m) leh Martin Dubravka (loan) te an lalut. Ten Hag-a'n result ṭha a neih theih nan United-in nipuiah ringawt pound maktaduai 216 an theh chhuak a, an player lei tharte pawh an hmang ṭangkai viau bawk.