Premier League club an hausa; Record thar an siam!

Chelsea ringawtin thlasik transfer-a sum an sen zat chu pound maktaduai 288 a ni a, Bundesliga, La Liga, Serie A leh Ligue 1-a club ten January transfer bazar-a sum an sen belhkhawm aiin a tam zawk.

European football-a Premier League club-te hausak bikzia leh sum sen huaizia chiang taka hmuhtirin kan awm leh ta a, January-a English top flight league club-ten sum an sen zat chu pound maktaduai 815-a ni - January-ah heti zata sum tam hi Premier League club-ten an la seng ngai lo.

Thawhlehni zan, keini sanaa, nimin zing dar 4:30 khan thlasik transfer bazar hi khar a ni a, transfer tawp nia Premier League club-te sum sen zat ringawt hi pound maktaduai 275 chuang a ni a, tun season-a Premier League club-ten player lakluh nana an sen zat chu pound tluklehdingawn 2.8-ah a kai chho.

Chelsea chuan Benfica aṭangin midfielder Enzo Fernandez chu pound maktaduai 107 ngawt sengin an lalut a, hei hi Premier League transfer record a ni nghal bawk a ni.

Sum a tam

September, 2022 khan Premier League club te chuan player lakluh nan pound tluklehdingawn 1.9 an seng a, January-a an sum sen zat nen chuan tun season transfer-a PL club-te sum sen zat chu £2.8tld a tling.

Kum 2017 khan Premier League club-ten player lakluh nan £1.4tld an seng a, he record ding lai hi tun season-a PL club-te sum sen hian a rawn khum chiang ta hle.

Tun thlasik transfer hma, Premier League thlasik transfer-a sum sen tam ber record chu kum 2018 khan sen a lo ni tawh a, hemi ṭuma an sum sen zat hi £430mtd a ni a, tun thlasik-a sen zat £815mtd hian a khum chiang viau.

European top five league club-ten thlasik transfer-a sum an sen aṭanga 79% chu Premier League club-te sen a ni a, PL club-ten transfer tawp nia an sum sen zat £275tld hian kum 2018 transfer tawp nia an record siam £150mtd chu a khum chiang hle.

Tawpna ni chu!

Ṭum dang zawng aiin tun thlasik transfer chu a ngaihnawm em ni chu aw, tih mai tur a ni - Chelsea-in Enzo lakluh nan £107 mtd an sen chu langsar ber a ni a, kum 2021-a Manchester City-in Jack Grealish lakluh nana £100mtd an sen chu a khum.

Tottenham Hotspur chuan Sporting Lisbon full back Pedro Porro chu season tawp thleng atan loan-in an la a, an duh chuan season tawpah £40mtd-in an lei thei ang. Hetihlai hian defender pahnih Matt Doherty (permanent) leh Djed Spence (loan) te chu an chhuahtir thung.

Premier League hmahruaitu Arsenal chuan £12mtd-in Chelsea midfielder Jorginho an lalut a, Manchester United chuan Bayern Munich aṭangin midfielder Marcel Sabitzer chu loan-in an la bawk.

English club langsar zingah Liverpool-in transfer tawp niah player lakluh an nei lo a, Manchester City-in lakluh chu sawi loh, full back Joao Cancelo chu Bayern lamah loan-in an kaltir - an duh chuan season tawpah £61.5mtd-in a nghetin German club hian an lalut ang.

Club dang thlirna

Premier League club zingah table mawngphah luahtu Southampton pawhin awm mai mai bik an tum lo a, Ghana winger Kamaldeen Sulemana chu French club Rennes aṭangin £22mtd-in an lalut a, an player man to ber a ni - Nigeria striker Paul Onuachu chu Genk aṭangin an lalut bawk.

Bournemouth chuan Ukraine centre back Illia Zabarnyi chu Dynamo Kiev aṭangin £24mtd in an lalut a, Ivory Coast midfielder Hamed Traore chu Sassuolo aṭanga loan-a lalutin, an duh chuan £20mtd-in nipuiah a nghetin an lalut thei ang.

Nottingham Forest chuan Atletico Madrid defender Felipe leh Newcastle midfielder Jonjo Shelvey te an lalut a, Paris St-Germain goalkeeper Keylor Navas chu loan-in an la bawk - an lalut hrawl hle.

Leicester City chuan Stoke City defender Harry Souttar chu £20mtd thlenga a man sang chho thei turin an lalut a, Crystal Palace chuan France youth international Naouirou Ahamada chu Stuttgart aṭangin £9.7mtd sengin an la ve bawk.

A langsar

January transfer-ah thil thleng langsar a awm nual a, Chelsea-in Enzo an lei bakah £89mtd senga Shakhtar Donetsk forward Mykhailo Mudryk an lakluh chu a langsar hle.

Arsenal-in Jorginho bakah Brighton aṭangin striker Leandro Trossard chu £21mtd in an lalut a, Serie A club Spezia aṭangin Jakub Kiwior chu £17.6mtd-in an lalut bawk - champion an tum hle.

Liverpool-in PSV Eindhoven aṭanga £35.4mtd - £44.3mtd senga Cody Gakpo an lakluh pawh mipui barakhaihtu a ni a, Newcastle United-in Everton aṭanga £45mtd senga Anthony Gordon an lakluh pawhin sawi zui a hlawh.

Leeds United-in club record-a Hoffenheim forward Georginio Rutter (£36m) an lakluh te, Danny Ings-a'n Aston Villa chhuahsana £15mtd-a Aston Villa a zawm te, Bournemouth-in £20mtd senga Lorient winger Dango Ouattara an lak te, Leicester-in £17mtd-a Victor Kristiansen an lei te, Aston Villa-in Chicago Fire aṭanga kum 18 mi Jhon Duran (£18mtd) an leite pawh titi a tling.