Arsenal thlasik bazar bihchianna

Premier League champion tum Arsenal hian thlasik bazar an hmang fuh viau em, tih chu a tehtu a zirin a chhanna a inang lo ngei ang, season chawhnu lam an hman danin Mikel Arteta naute chet fuh leh fuh loh chu a takin a lantir dawn a ni.

Tun thlasik bazar chhungin - forward Leandro Trossard, midfielder Jorginho leh defender Jakub Kiwior te an lalut. An player thar pathum zinga pahnih hi Premier League tawnhriat nei ṭha an ni a, kum 22 mi Kiwior erawh English football huanga mi thar a ni thung.

Champion lai Manchester City lakah Arsenal hian point ngain hma an hruai mek, match khatin an la khel tlem bawk. Player an hip lai tak tur a ni a, sum an theh chhuak ngam bawk - mahse an duh tak an la thei em, tih erawh ngaihtuah tham a tling.

Mykhailo Mudryk lak tumin an hel ngar ngar a, mahse Chelsea lamah a kal ta daih - a aiawh turin Trossard an la. Moises Caicedo lak tumin bei viau mah se Brighton lamin an chhuah phal lo, bazar tawp niah Jorginho an la ta zawk.

Poland international Kiwior hi rinrawl tur a ni nghal dawn lo. Chutihrualin Gabriel hian match zawng zawng deuh thaw a khel a, ani hi a inhliam emaw hrem emaw a tawk a nih chuan a thachhawng dawl thei tur a ni ang - Rob Holding nen an inel dawn bawk.

Tawnhriat nei Jorginho

Chelsea aṭanga Jorginho lakluh hi 'Plan B' tia sawi theih a ni, Ecuadorian midfielder Caicedo lak tuma thapui an thawh hnuah an beidawng a, chumi hnuah Italy international hi an rim a, rei vak loah an inrem.

Mahse, kum 31 mi Jorginho hi Premier League tawnhriat nei ṭha a ni a, inkhel kalphung thlak danglam thei khawpa fing leh ball sem thiam a nihna hi Arteta-a'n a hmuh hmaih lo, nakin hun ni loa tun season champion an tum a nih chuan Jorginho lak hi a dik.

Gabriel Jesus, Oleksandr Zinchenko leh Martin Odegaard te hi player themthiam bik an ni a, an khelh dan phung leh Jorginho khelh dan kalphung a inang viau, chuvangin Arsenal tana khelh a harsat loin a rinawm.

The Times chief football writer Henry Winter chuan, "Arsenal fans ṭhenkhatin Jorginho an lawm lo hi mak ka ti hle. Tawnhriat nei, champion tawh, inkhel tidanglam thei, ṭhiante ball hloh - lo chang let nalh nalh thei.

"A che muang hret an ti a ni mai thei, mahse Arsenal team hi a uap hneh khawp ang," a ti. Tottenham leh England striker hlui Darren Bent pawhin Jorginho an lalut thei chu Gunners tana chanchin ṭha a nih thu a sawi ve bawk.

EPL squad zingah Arsenal hi chawhruala kum naupang ber an ni. Arteta-a'n a enkawl tirh khan FA Cup an champion, hemi ṭum hian Granit Xhaka, Rob Holding, Kieran Tierney leh Eddie Nketiah ten final an khel.

Anni ho bakah hian Odegaard chuan Real Madrid tan Copa del Rey a lo la tawh bawk, anni bakah hian inkhel boruak sanga tawnhriat nei tam an mamawh - EPL champion tum tan chuan champion tawh player neih hi an mamawh hle.

Jorginho hian 2021 khan Italy chu Euro nomawi a chawipui, a club Chelsea chu Champions League leh Super Cup a lakpui bawk - heng final lian pathumah hian player pawimawh a ni vek - Arsenal tan pawh season chawhnu lamah a tawnhriat hi a ṭangkai ang.

Mudryk aiah Trossard

Arsenal ṭantuten YouTube lamah Mudryk inkhel lai video an en kual a, a chanchin an ziahna English media hrang hrang an chhiar kual bawk, tlan chak leh goal khung thei a nih avangin Emirates Stadium lama seng luh hlan an nghakhlel hle.

Mudryk hi Gunners zawm châk tak ni awm takin social media velah a chetla ve reng bawk. Mahse, Gunners hian Shakhtar Donetsk phalna zat sum an theh chhuak ngam lo - Chelsea an rawn lang a, sum nei club hian an la hmak.

Blues tan Mudryk-a'n match a khel ta ngei a, goal khung lo mah se khelmual chhunga a chet tlat danah Premier League chu a ngam dawn viau tih a lang, match khat chauh kha chu a nihna teh nan chuan a la tawk lo thung.

Ukranian league season kal laiah Mudryk hian goal sarih a khung, ani aia Arsenal lak tak Trossard hian Premier League-ah goal sarih ve tho a khung, an league khelhna inhautak hleih dan chhut chuan, tun season bikah chuan Trossard sulhnu hi dahsan a awl zawk.

Trossard hian EPL bikah, minute 147 zelah goal khata inrawlh anga chawhrual theih a ni, hei hi goal a khung leh assist chhiar a ni. Mudryk erawhin match a la khel tlem a, minute 65 zelah goal khata inrawlha chawhrual theih a ni thung.

Arsenal lak tak loh Mudryk (kum 22) leh Caicedo (kum 21) te hi hmabak nei êng tak leh ṭha bik chu an ni ngei mai - nakin hun ngaihtuah chuan anni pahnih hi lak châkawm tak, team la tichak zel thei chi player chu an ni ngei mai.

Mahse, tuna Arsenal mamawh tak erawh chhawr nghal theih bakah, an player naupang rual ho aia tawnhriat ngah a ni. Chelsea tan Jorginho hi season kal laia an ball hloh la let hnem ber a ni a, an khingpuite ball chan chhuhsak hnem ber a ni bawk.

Thomas Partey tan Italy international midfielder hi elpui hautak a ni phak ang. Jorginho hi la lo ni ta se la chuan Partey thachhang dawl turin Albert Sambi Lokonga chu an innghahna tur a ni dawn, ani ai chuan Jorginho hi an thlan zawk vek a rinawm.