Zverev an hrem dawn lo

Tharum thawhna kawngah Alexander Zverev chu chhui ni mah se a thiam lohna hmuh a ni lo a, tennis huanga world number 2 pawh lo ni tawh hian hremna a hmachhawn dawn lo a ni.

German tlangval hi a bialnu hlui Olya Sharypova chu kutthlaka puh a ni. Kum 2021 October thlaa thil thleng chungchang hi Association of Tennis Professionals (ATP) chuan a chhui chiang, mahse mipa tennis thuneitu sang hian hremna tur khawp thil sual an hmu lo.

ATP hian hemi chungchang zirchiangtu pawl Lake Forest Group thil hmuhchhuah an lo en chhawng leh a ni a, kut inthlakna chungchangah hian thil thleng finfiahna tur dang leh chiang zawk a awm a nih chuan hremna chungchang hi ennawn leh thei tura tih a ni thung.

Zverev chuan, "Ka chungchang an chhui tirh aṭang khan ṭha takin ATP ka thlawp a, thudik hai chhuah a ni hi ka lawm hle. Ka ṭhiante, chhungkua leh min ṭantu tam takin hun harsa ka tawh lai pawhin min thlawp tlat a, an chungah ka lawm takzet," a ti.

Kum 25 mi Zverev hi player theihna nei sang tak a ni a, mahse inelna lian Grand Slam huangah a la champion chiah lo. Olympic gold medal erawh a la tawh, tennis a khelh chhungin Olympic champion a nih hi a thlen san bera sawi theih a ni.