League Cup final khel tur Newcastle United

"Kum 1999 khan..." tih hi chu hmanni ang mai kha a ni a, mahse, hmanni lawka thil thleng ang maia i ngai a, i la nula/tlangval bawk si a nih chuan - neih i hun ve tawh tihna!

Ni e, kum 1999 kha, "Kum 24 liam ta khan..." tih a ngai tawh - kum 24 liam ta khan Newcastle United chuan FA Cup final an khel a, Manchester United lakah an tlawm.

Hemi hnuah hian Magpies hian nomawi chawi chu sawi loh, Cup final an khel leh tawh lo hrim hrim a, mahse, kum 2023 a her chhuah meuh chuan Cup final an lut ve leh ta.

Newcastle hian Thawhlehni zan khan League Cup semifinal-ah Southampton chu 2-1 in an hneh a, inkhel hmasa nena belhkhawmin 3-1 in an chak - Sean Longstaff chuan goal hnih khungin, Saints tana Che Adams khungin awmzia a nei phak lo.

A hming Longstaff

Newcastle-in semifinal first leg-ah 1-0 in hnehna an chang a, mahse, second leg a la awm miau avangin coach Eddie Howe pawh a ṭawng uang duh lo - mahse, St James' Park-a an inkhelh leh meuh chuan chak tur a chiang hma hle.

Inkhel ṭan aṭanga minute ngana lekah Longstaff chuan goal hmahruai a khung a, Newcastle-a 'harhna' thlentu pawimawh Kieran Trippier-a hnathawh rah a ni.

Minute 21-na a ni a, Longstaff chuan mahni inringtawk tak chungin an goal hnihna a khung leh a, inkhel hmasa nena belhkhawmin 3-0 a ni der tawh a, chak tur a chiang tawh.

Saints beiseina siamsak turin Adams chuan first half-ah si phurh sut ṭhen mah se, an tho tawh lo. Minute 82-naah Magpies midfielder Bruno Guimaraes chu Samuel Edozie laka a chet dan avangin hnawhchhuah ni bawk mah se Saints tan chhawr turin a tlai hret tawh.

Fak tlak Howe

Nikum lawka Saudi Public Investment Fund-in Newcastle an lei khan, player langsar pui pui lalut a, sum tam tak theh chhuak tura ngaih an ni a, mahse, Saudi lam neitute hian âtthlak taka chet nghal ngawt an tum lo.

Magpies fan-ten Jose Mourinho hming an lam rik lai khan English coach vantlang Howe an lalut a, beiseina tihsan ngam a harsa hle. Mahse, Howe hian tlin takin a hna a thawk a, player langsar ringawt um loin, a mamawh ang tak a lei chat zel.

Newcastle goalkeeper Nick Pope-a'n a zawna match 10 goal a chhuah loh hnuah Saints lakah chhuah mah se Magpies chet ṭhat nana player thawhhlawk a ni a, ani bakah hian Trippier, Dan Burn leh Sven Botman te chu tlarhnung lamah an ṭangkai ṭhin hle.

Saints lakah hnawhchhuah ni mah se Guimaraes ṭangkaizia kan hria a, pound maktaduai 60 man Alexander Isak sawi bo a thiang lo a, Everton aṭanga £45mtd-a lakluh Anthony Gordon chuan a la zawm dawn cheu bawk.

Hmabak a êng

Newcastle boss Howe chuan, "Zanin chu nuam ka ti takzet a ni. He club-a telve zawng zawngte ka lawmpui a, zanin boruak kha chu a sang hle. Player-te tan a chhehvel boruak khan khelh a tinuam khawp ang," a ti a, fan-te chungah lawmthu a sawi.

League Cup semifinal second leg inkhel dangah United leh Nottingham Forest chu nizan khan an intawng a, an result kan hre hman lo - mahse, first leg-ah United hi 3-0 in an chak a, thilmak a thleng a nih loh chuan Magpies nen hian final-ah an intawn a rinawm.

Newcastle hi Premier League-ah pawh pathumna an ni mek a, match 20 khelh tawhah vawi khat chiah an la tlawm a, vawi kua draw neiin, vawi 10 chak an nei. Howe naute hian Champions League khelh phak an inbeisei a, League Cup final an lut leh ta bawk - an tan kawng zau taka hawnin a awm zel e.