James tan record thar a hnai zel

Basketball inelna ngaihhlut hlawh ber NBA huanga point nei hnem ber ni turin LeBron James dinhmun a ṭha zel. James hian nimin zing khan Los Angeles Lakers chu New York Knicks lakah 129-123 in a chakpui.

Lakers an chak theih nan James hian point 28 a nei a, hei bakah hian assist vawi 11 neiin rebound vawi 10 a la bawk - tun season kal laia a vawi khat nan triple-double a nei, kum 38 a tlin hnuah pawh a la ṭha hle.

American star James hian point nei hnem ber Kareem Abdul-Jabbar (38,387) a tluk lohna chu point 89 chauh a ni ta, tun ang zela a khel thei a nih chuan match thum chhung velin record thar hi a siam thei dawn.

Assist neih hnem lamah pawh James hi palina a ni, ṭhiante basket neih tur hi vawi 10,338 a siamsak tawh. Assist nei hnem ber John Stockton (15,806) nen erawh an inkar a la zau viau a, record khum a harsain a rinawm.

A zawna match hnih an tlawm hnuah Lakers an chak ve leh ta a, chak lo Knicks erawh Jalen Brunson-a'n point 37 neihsak mah se an tho chhuak thei rih lo, an match hnuhnung pariat zinga parukah an tlawm a ni.

Inkhel dangah Nikola Jokic chuan tun season chhunga a vawi 16 nan triple double a nei! Jokic hian 26 point, 18 rebound leh 15 assist neiin Denver Nuggets chu New Orleans Pelicans lakah 122-113 in a chakpui.

Milwaukee Bucks pawhin a zawna vawi nga an chakna ni turin Charlotte Hornets 124-115 in an hneh. Bucks thiampuipa Giannis Antetokounmpo chuan point 34 neiin a team tan a thawhhlawk leh hle a, inkhel dangah Los Angeles Clippers leh Miami Heat te an chak bawk.