Chennaiyin khelmualah Odisha an leng dawn

Zan thum an chawlh hnuah Indian Super League chu zanin dar 7:30 hian khelh ṭan a ni leh dawn ta a, Mizo awm lohna Chennaiyin FC chuan Mizo player pariat kawltu Odisha FC an lenchilh ang.

ISL league round a tawp hnai tawh a, match khelh tur la ngah berte pawhin match nga bak khelh tur an nei tawh lo - Chennaiyin hian league match 15 khelh tawhah point 17 an nei mek a, playoff khelh beiseina an la nei.

Mahse, South Indian club hi zaninah an tlawm chuan an beiseina a bo tawh tiin a sawi theih ang a, chhiarkawp danin a theih dan la awm dawn mah se thilmak tawpthang a thlen a ngai tawh ang.

Odisha an ropui bik lo - match 15 khelh tawhah point 22 an nei mek a, playoff khelh beiseina tlem an la nei. Mahse, Chennaiyin ang thoin an tan tlawm a thiang tawh bik lo a, an chak erawh chuan point hnih chauhin palina FC Goa an thlau tawh dawn a ni.

Jerry Mawihmingthanga leh Isaac Vanmalsawma ten Odisha-ah hian hmun pawimawh an chang a, anni bakah hian goalkeeper Lalthuammawia Ralte, defender Lalruatthara, Lalhrezuala Sailung, midfielder Paul Ramfangzauva, forward CVL Remtluanga leh Isak Vanlalruatfela te an awm bawk.