Pahnihnaah Sabalenka inhlangkai

Hmeichhe tennis thuneitu sang Women's Tennis Association (WTA) chuan tun hnai khan world ranking an ti chhuak thar, tournament hnuhnung ber Australian Open-ah che ṭha tawk lo mah se Iga Swiatek chu a chung berah a la awm zel.

Belarus nula, tun hnaia Grand Slam champion Aryna Sabalenka chu pahnihna a ni a, tennis a khelh hun chhunga a ranking san ber ṭum a tawng. Ani hian Australian Open nomawi chawi turin Elena Rybakina chu 4-6, 6-3, 6-4 in a hneh.

Kum 23 mi Rybakina pawhin a hma a awm player 15 ngawt kal kanin 10-na dinhmun a luah, a sang zual 10 zinga a tel vawi khatna a ni hial. Season hmasa Wimbledon a champion khan ranking point pek ni se la chuan a sang zual ngei ang.

Rybakina hian Australian Open final lut tur khan, a kalkawngah Grand Slam champion tawh player pathum ngawt a hneh. Theihna a nei sang a, French Open, Wimbledon leh US Open an khelh zui turah pawh enbik zingah a tel dawn.

Australian Open fourth round-ah Swiatek a chak lo, mahse Polish nula hian season hmasa a hman ṭhat avangin a la fal hle, amah hnaih bertu Sabalenka ai hian point 4000 chuangin hma a la hruai fal thei a ni.