Heiko Herrlich an hrem
Bundesliga club Augsburg head coach Heiko Herrlich chu inkhung hranna dan a bawhchhiat avangin hrem a ni a, zanin dar 7:00-a Wolfsburg an mikhual hunah khelmual chhungah a naute a ho thei lo ang.
Augsburg hi hotel pakhatah an awm khawm. Ningani khan Herrlich hian hotel chhuahsanin hanawhna hlo (toothpaste) chu hmun danga mi a lei, hei hi German Football League (DFL) in dan an siam khalh a ni.
Kum 48 mi Herrlich hian March 10 khan Augsburg hi a zawm chauh, tun ṭuma Wolfsburg an hmachhawn tur hi a team thar a kaihhruaina hmasa ber a ni ang, a tum ang erawh chuan a awm thei dawn ta lo.
Herrlich chuan, “Hotel ka chhuahsan kha ka tih sual a ni. Hriselna leh invenna kawng hrang hrang ṭha takin ka zawm a, tun ṭumah erawh midang entawn tlak loha ka awm zauh hi pawi ka ti hle, ngaihdam ka dil,” tiin a sawi.
Bundesliga table-ah Augsburg hi 14-na an ni mek, relegation zone aṭanga an himna chu point nga chauh a nih avangin chetsual loh a pawimawh. Coronavirus len hnuah chet ṭhat an tum ang.
Match pakhat leh a behbawm
1. Inkhel pakhatah mi 300 vel bawr chauh an inhnamhmawih
theih dawn.
2. Stadium chu zone (peng) pathum - a chhung, mipui ṭhutna leh a pawn lama ṭhen hran a ni.
3. Zone 1 chu khelmual chhung a ni a, player, substitutes, coaching staff, referees, ball boys, medics, security leh hygiene staff-te an ni ang.
4. Zone 2 hi mipui ṭhutna ṭhin a ni, a ruak dawn. Media box a awm dawn a, TV-a chhuah tur thla latu leh a buaipuitu an awm dawn.
5. Stadium pawn leh a sir vel chu zone 3 a ni. Pawn lama fans pungkhawm an awm palh pawha hnawt darh tur police an awm ang.
6. Ball boys pawh pali chauh an awm dawn, kum 16 chin an ni ang. A khat tawkin an kut an ti fai dawn a, ball an pet tur pawh inkhelh hma in tihfai a nih dawn bakah, inkhelh laklawh lai pawhin a remchan hunah an ti fai ṭhin ang.
7. Mascot a awm dawn lo, player-ten naupang an kai chhuak dawn lo a, inkhelh hma in chibai leh team thlalak a awm lo ang.
8. Khelmual chhunga inkhel lai player ni lo, stadium chhunga awm zawng zawngte chu hmai tuamna (mask) hmang vek tura tih an ni.
9. Inkhelh banah stadium-ah chaw an eikhawm mai ṭhin, tun ṭumah erawh ei siamtu luh phal a ni lo a, team pakhat ei siamtu ten siamsa an pek a ngai ang.