Man United-in final an thleng, nomawi a hnai?
Manchester United-in Carabao Cup final thleng turin harsatna an tawk lo a, City Ground-a 3-0 a an hneh tawh Nottingham Forest chu Nilaini zan khan 2-0 in an hneh nawn. Erik Ten Hag-a hote aggregate-ah 5-0 in an chak a, Newcastle United nen February 26, Pathianni hian Wembley Stadium-ah nomawi an inchuh ang.
Old Trafford-a inkhelah substitute Anthony Martial leh Fred ten goal an khung a, nikum October thla hnuah Jadon Sancho a rawn kir a, English winger hi second half-ah bench aṭangin a lut. Dutch manager Ten Hag a fimkhur a, first leg-ah 3-0 ngawta hma an hruai tawh chungin player a siksawi meuh lo. Player thar Marcel Sabitzer-a'n executive box aṭangin a thlir bawk.
Goal hnih chauh
Man United-in player ṭha an luhtir chungin first half-ah an goal bawh a na tawk lo a, hun chanve hma lamah goal chance hmuh tur a tam lo. Dutch forward Wout Weghorst-a'n first half tawp hma deuhin goal ban a tauh per thung.
Second half-ah Weghorst chu box chhungah tihtluk ni mah se referee Peter Bankes-a'n penalty a ngai lo. Ten Hag-a'n chak tumin bench aṭangin Anthony Martial, Marcus Rashford leh Jadon Sancho te a luhtir a, inkhel a nung sawt.
Minute 73-naah Forest player ball pass fimkhur tawk loh avangin United-in an vaw let a, Martial-a'n thui tak a khalh hnuah Rashford pein English forward ball pet hi dang hman mah se a per chu French forward Martial-a'n a khung.
Minute thum hnuah goal dang a lut lehnghal a; Fred, Sancho leh Martial ten an ball an inpek kual hnuah dinglam aṭanga Bruno Fernandes ball vawrhluh chu Rashford-a'n cross lut lehin Fred-a'n goal ruakah a khung. Man United-in Forest tlarhnung an ṭhiat chiang hle.
Forest pawhin goal khat khungna remchang an nei a, David de Gea aia lut keeper Tom Heaton-a'n Danilo pet chu ṭha zetin a dang a, hemi per hi Sam Surridge-a'n chang mah se goal ruakah a khung lo. Man United-in goal an chhuah lo a, 5-0 zeta an chak avangin Wembley Stadium an pan thei ang.
Nomawi a hnai?
Manchester United tan nomawi chawi turin match khat chak chauh a ngai tawh a, amaherawh-chu an khingpui tur hi tun hnaia club hmasawn ber zinga mi Newcastle United an ni. Red Devils ai mahin Magpies tan League nomawi hi a hlu dawn, Newcastle hian kum 1955 hnuah tualchhung inelna lian thamah an la champion lo.
Man United manager Erik ten Hag chuan, "Final thlen hi a ropui a, mahse final-a chak chuang si loh chuan hlawhtlinna a ni pha lo. League Cup nomawi chawi ngei kan duh a, amaherawhchu final khelh hmain inkhel dang kan ngaihthuah hmasak a ṭul dawn," tiin a sawi.
Inelna paliah Man United hi an la dam vek avangin match khelh tur an ngah hle. February 26-a Newcastle United an hmachhawn hma hian Red Devils hian Premier League match leh Europa League match hnih khelh tur an nei dawn a, final hma ni thumah Barcelona nen an inhmachhawn dawn. Magpies erawhin final hma ni riat an awl dawn a, inpuahchahna hun an nei ṭha khawp ang.
Man United leh Newcatle te inkhel tur hi Wembley rematch tia sawi theih a ni. Kum 1999 khan Magpies hian FA Cup final an thleng a, Man United lakah an tlawm. Sir Alex Ferugson-a hoten Nou Camp-ah Bayern Munich an hneh a, treble champion an ni. Ten Hag-a hote hi nomawi pali chawi thei an la ni a, amaherawhchu an fixtures neih dan thlirin nomawi pakhat chawi pawh a harsa dawn.