India tan Shubman Gill a ropui zel

Nilaini zan khan India-in New Zealand chu 168 runs-in an sawp a, T20 series-ah 2-1 in hnehna an chang. Men in Blue tan opener Shubman Gill a che ropui a, ball 63 lekah 126 runs siamin a tawp thlengin a dam.

Narendra Modi Stadium-ah India captain Hardik Pandya-a'n bat hmasak a thlang a, opener Ishan Kishan-a'n run khat lek siam mah se Shubman Gill erawhin hming chher nan a hmang.

Kum 23 mi Shubman Gill hian Black Caps bowler-te ball vawm chu kil tinah a vuaksak a, Rahul Tripathi-a'n a hna a tlin bawk. Tripathi hian ball 22-ah 44 runs a rawn siam a, Suryakumar Yadav (24) leh Hardik Pandya (30) ten rawn siam belh bawkin India-in over 20-ah 234/4 runs an siam tling hial.

New Zealand tan target a sang mah mah a, top order an chetsual bawk avangin run tam an siam lo. Panganaa lut Daryl Mitchell-a'n 35 runs siam ve bawk mah se over 12.1-ah 66 runs siamin an thi vek. India captain Hardik Pandya-a'n (16/4) wicket li a la a, Arshdeep Singh (16/2), Umran Malik (9/2) leh Shivam Mavi (12/2) ten wicket hnih ṭheuh an la bawk.

Player of the series-ah captain Hardik Pandya hi thlan a ni a, Shubman Gill-a'n player of the match a dawng thung. Gill hi tun hnaiah che ṭha hle. Thla hnih chhung lekin Test-ah century a siam a, ODI-ah double century a siam a, T20-ah century a siam leh bawk.

India hian Australia nen Test match vawi li an khel zui dawn a, Test match hmasa ber hi February 9 aṭangin VCA Stadium, Nagpur-ah an khel ang.