Sum hmang hnem Chelsea inlan hun a thleng

Thlasik transfer bazar an khar meuh chuan Chelsea chanchinin sawi a hlawh ber - a awm lo hran lo. London club hian thlasik transfer-ah ringawt player pariat an lalut!

Chelsea hian player pariat hi an lalut a ni satliah lo a, man to tak zelin an lei - Enzo Fernandez lei nana pound maktaduai 106.7 ngawt an sen hi team thar dinna tham khawpa pawisa tam a ni.

Hetiang boruak avang hian London club-in ngaihven an hlawh thar lehzual hi a awm lo hran lo a, chutihrual chuan heti zat player langsar remkhawm hi Graham Potter tan eng ang taka harsa nge ni ang, tih hriat a châkawm.

Chelsea inlan hun nghakhlelte tan zanin dar 1:30-ah an inkhel en tur a awm nghal dawn a, Fulham an mikhual dawn. Premier League kai thar Fulham hi table-ah pasarihna an ni mek a, 10-na Chelsea aiin an sang zawk tih hriat a ṭha.

Inlan tur

Zaninah Chelsea player thar engzat nge inlan dawn, tih chu thil hriat châkawm a ni - Champions League-ah chuan player thar pathum chiah ziah luh phal a ni a, Premier League-ah erawh duh zat zat ziah luh theih a ni.

Chutihrual chuan squad-a player awm zat chu 25 aia a tam a thiang lo a, tuna senior squad zinga engemaw zat chu reserve team lamah awmtir an ṭul dawn tihna a ni - London club an insingsa tak tak dawn e!

Liverpool laka rei lotê a khelh chhunga hmuhnawm em em mai Mykhailo Mudryk-a'n bul a rawn ṭan ngei tawh a rinawm a, thlasik transfer-a chhuak hman ta lo Hakim Ziyech leh Conor Gallagher te tan erawh hmun a awm a rinawm lo.

Chuti a nih chuan pound maktaduai 80 chuang man forward hi Mason Mount leh Kai Havertz te nen an inthlawp tura ngaih a ni a, hei hi en a châkawm tawh hle.

Enzo hi?

Mipui hmuh châk ber tia chhal ngam chu Enzo Fernandez a ni a, mahse, Argentine midfielder hi inlan nghal tur khawp chuan Potter-a tan rin ngam nghal a harsa mai thei.

Chutihrual chuan London club hian Arsenal hnenah tawnhriat nei ṭha Jorginho an chhuahtir a, N'Golo Kante leh Denis Zakaria an la inhliam bawk si avangin Mateo Kovacic kawp turin Enzo a lut a nih pawhin a mak lo ang.

Potter-a tan pressure a na sawt dawn tih chu chiangsa a ni a, Fulham hneh a awlsam dawn lo - Cottagers (Fulham sawina) hian thlasik transfer-ah Serbian international Sasa Lukic an lalut a, ram tana a khelhpui, league goal 11 khung tawh Aleksandar Mitrovic a chawm tur hi hmuh a châkawm.

Fulham hian season duhawm tak hmangtu, Portuguese defensive midfielder João Palhinha, tun season-a goal hnih leh assist vawi nga nei tawh Andreas Pereira leh Chelsea hrechiangtu Willian an nei tih hriatsak a ṭha.