Olympic sawn vangin sum hman belh tur a tam

Tokyo Olympic chu Covid-19 vangin kumina neih theih a ni lo a, nakkum nipui laia neih tura sawn a ni. International Olympic Committee (IOC) chuan infiamna khawmpui lian a sawn avang hian dollar maktaduai 800 a hman belh a ngai dawn.

Dollar maktaduai 650 chu a thlengtu lam tan a ni dawn, a dang maktaduai 150 erawh loan hmangin international sports federation hrang hrang tan leh sum mamawh zualna bikah hman a ni ang.

IOC president Thomas Bach chuan, “Kan hun tawn hian a ken tel a ni a, tu pawhin hetiang harsatna bikah chuan puih ngai an awm a nih chuan puih an hreh lo.

“Infiammi tam takin inbuatsaihna leh inzirna hun an neih belh rualin ṭhenkhat tan erawh kum ṭha tak a liam thung, hlim tlang taka inelna kan neih theih nan IOC chuan a theihtawp a chhuah zel ang,” a ti.

Tokyo Olympic hi nakkuma neih tur ni mah se Tokyo Olympic 2020 tih chu a hming a ni zui dawn. Inelna thleng tura an inbuatsaihna lama an hotupa Christophe Dubi chuan an ruahman angin thil kal lo mah se theihtawp an chhuah chhunzawm thu a sawi ve bawk.