Mbappe tana zan lungngaih thlak
Penalty a hlah a, a pet nawn hnuah pawh a hlah - ball per let hi hnai takah a khung ṭhelh zui a, chumai a la ni lo; hliam vangin khelmual aṭanga lak chhuah a ngai - Kylian Mbappe tan chuan zan lungngaihthlak a ni.
Nilaini zan Ligue 1 inkhelah Paris St-Germain chuan Montpellier 3-1 in an hneh. Paris club tan Mbappe che chhe viau mah se, second half-ah Fabian Ruiz, Lionel Messi leh Warren Zaire-Emery ten goal khat ṭheuh an khung.
Minute 10-naah PSG hian penalty an hmu, a pet turin Mbappe a rawn ding chhuak. France international pet hi keeper Benjamin Lecomte chuan a lo dansak, mahse a pet hmain Montpellier player ṭhenkhat chu box chhungah an lo lut hman.
VAR hmanga en nawn a ni a, penalty hi pet nawntir a ni. Keeper Lecomte a zuang dik leh tho a, dang hman chiah lo mah se goal ban a fuh. Ball per let hi Mbappe hma zawnah bawk a tla, mahse goal bar chungah a pet chhuak - vanduai a kaltluang laklawh.
Minute 21-na chauh a ni, hliam vangin Mbappe chu thlak a ngai. Hliam vangin Neymar a inlan thei bawk si lo, goal khung kawngah mawhphurhna chu Lionel Messi kuatah a innghat chhunzawm thui ta hle.
Argentina captain hian first half-ah goal khat chu a khung, mahse offside vanga hnawlsak a ni. A goal hnihna erawh sawisel bo a ni, defender pahnih kara dawk chhuakin, chep tak karah keeper Lecomte ven loh karah a khung zeuh.
PSG hian match 21 aṭangin point 51 an hmu a, pahnihna Marseille aiin point ngain an sang zawk. Inrinni zan dar 9:30 hian an khelmualah Toulouse an lo mikhual chhunzawm leh nghal dawn a ni.
Paris Saint Germain head coach Christophe Galtier chuan, "Kylian kha a kaihzaah tih palh a ni a, a malpui hnung lam tihrawl a ni bawk. Eng ang taka na nge a nih ka la sawi mai thei lo, endik a nih hnuah a chiang chauh ang.
"Sergio Ramos pawh 100%-in a dam fel lo, chuvangin kan thlak. Season chawhnu lam hun pawimawh kan thleng chho dawn a, match hautak kan neih hnem dawn avangin player kan dim a ngai," tiin a sawi.
Paris club hian February 14, Thawhlehni zanah Champions League last 16 khel turin Bayern Munich an mikhual dawn. Inelna dang zawng aiin UCL hi an ngaipawimawh dawn, chuvangin player ṭha zawng zawng dam se an duh ang.