Barcelona an chak leh ta, hma an hruai zel
Spanish La Liga-ah Barcelona-in ro an rel chhunzawm zel - Catalan club hian Nilaini zan khan an mikhualna ramah Real Betis chu 2-1 in an hneh a, La Liga-ah point riat zetin hma an hruai fal ta.
Barcelona tan Raphinha leh Robert Lewandowski te chuan goal khat ve ve an khung a, Barca defender Jules Kounde 'own goal' hmangin Betis hian si phurh sut ṭhen mah se, awmzia erawh a nei phak lo.
La Liga table-a pahnihna Real Madrid chuan point riatin Barca an phak lo mek a, mahse, nizan khan Real hian Valencia an mikhual a, an result kan hre hman lo.
Spanish champion hian hnehna an chan chuan Barca nen match 19 ve ve khel tawhin, point nga chauhin an phak lo dawn a, Carlo Ancelotti naute tan beisei bo tawp a la ni bik lo.
Silva channa!
Spanish Super Cup semifinal-ah team pahnih hi an lo intawng tawh a, hun pangngaiah 2-2 a an inhnehtawk hnuin penalty-ah Barcelona an chak hram - hei vang hian mahni muala khel Betis hian Barca lakah chak an tum ngam.
Mahse, Betis khelmual Estadio Benito Villamarín-a player langsar ber erawh Betis goalkeeper Rui Silva a ni a, Portuguese goalkeeper hian goal an chhuah hmain Pedri chance neih duhawm vawi thum ngawt a dansak.
Betis hi chance nei lo erawh an ni bik lo. Mahse, inkhel ṭantir lama a chance neih duhawm chu Luiz Henrique chuan a chhawr thei lo a, Sergio Canales khung ngei tura ngaih hnai set sawta an lo dan pawh uiawm tak a ni.
La Liga table chung bera fal taka hmahruai tum Barca-in goal an khung thei lo a, season thara Champions League khelh tum Betis-in goaol an khung bik lo - goal awm loin chawlhlawk hman a ni.
A hun têah...
Second half-ah thawnthu her danglamin a awm a, Barca an vanduai reng bik lo - set piece aṭanga ball kal chu Barca left back Alejandro Balde chuan chak taka um lutin, Raphinha tan a siamsak.
Leeds United aṭanga Barca zawmtu Raphinha tan chuan awlsam taka goal ruaka khung a ni tawh mai a, a hun neih a hlah lo - a la tawp lo cheu. Minute 80-naah hrem vanga league match thum zet a khelh loh hnua inlan Lewy a inlar a, an goal hnihna a khung.
Polish striker hian tun season La Liga-a goal 14 a khung tlinna chiah a ni a, inelna hrang hrangah match 25 khela goal 23 khung tawhin, assist vawi nga a nei tawh bawk.
Betis-in minute 85-naah Kounde 'own goal' hmangin goal khung ve mah se, hun a tlem hret tawh a, an tho chhuak hman tawh lo - hun tawp hnuah Betis midfielder William Carvalho chuan referee laka a lungawi lohna a lantir nasat avangin red card pek a ni.
