Hruaitluanga'n semifinal a lut

Khelo India Youth Games khelh mekah Mizo boxer Lalhruaitluanga chuan nimin khan quarterfinal-ah Andhra Pradesh boxer Patnana Prasad a hneh a, 51-54 kg huang inelnaah semifinal a lut.

Model Veng, Hnahthial boxer Hruaitluanga hi vawiinah semifinal a khel dawn a, Haryana boxer Ashish nen an inhmachhawn dawn - he thu buatsaih a nih lai hian an inhnek hun tur chiah a la hriat theih loh a, a hmachhawn tur boxer hi Youth World Championship, 2022-a silver latu a ni.

Khelo India-ah Mizo-ramin boxer pali a tir a, mipa pahnih leh hmeichhia pahnih an chhuak. Hruaitluanga bakah Lunglei Ramthar Veng tlangval PC Remruatdika chuan nimin khan quarterfinal a khel ve bawk a, mahse, 60-63.5 kg huangah Manipur boxer Chinglemba Moirangthem chu split decision-in a hneh lo.

Nilaini khan Hmeichhe lamah New Diakkawn, Kolasib nula Lalbiaknii chu 52-54 kg huangah a inlan a, mahse, Biaknii hian Haryana boxer Neeru Khatri ngam loin a tla nghal a, Chaltlang nula Naom Chingsannuam chu 54-57 kg huangah Uttar Pradesh boxer Anamika Yadav lakah sawisel theih takin chak lo zawkah puan a ni bawk.