Cancelo-a'n Bayern chakpui nghal

DFB Pokal last 16-ah Bayern Munich-in an player thar Joao Cancelo bul an ṭantir nghal a, khualmualah Mainz chu 4-0 in an sawp. Manchester City aṭanga loan hmanga an hawh Cancelo hian goal hmasa ber luh theih nan cross ṭha bik a nei a ni.

Bayern bakah Union Berlin, RB Leipzig leh VfB Stuttgart ten quarterfinal an lut ve bawk. League lama che ṭha Union Berlin leh Leipzig te hian Wolfsburg leh Hoffenheim te an hneh a, German Cup-a champion a awlsam dawn lo. Last 16 khelh hmabak match li dang hi karleh lamah khelh a ni ang.

Cancelo nghawng

Thawhlehniah Bayern Munich loan hmangin Man City aṭangin Cancelo an lakluh thu an puang a, Nilaini zanah an khelhtir nghal a ni.

Cancelo hi dinglamah awmtir a ni a, right back-a awm ṭhin Benjamin Pavard chu defender pathum zingah telh niin Matthijs de Ligt leh Dayot Upamecano te nen an awm ho.

Portuguese wing back hian a theihna lantir turin hun rei a mamawh lo. Cancelo hian minute 17-naah dinglam kilah Aarón Caricol-a'n veng mah se a duh thalin a cross a, Eric Maxim Choupo-Moting-a'n goal-ah a chantir. Bayern-in inkhel an thunun zui a, chak turin harsatna an tawk lo.

A goal belh zel

Julian Nagelsmann-a hoten kuminah Bundesliga match thum khel tawhin chak an la nei lo a, an khingpuite nen an inhnehtawk vek. Cancelo awm hnuah goal an khung hma a, Jamal Musiala pawhin a theihna a pholang leh ta bawk.

German rawlthar duhawm Musiala hian Thomas Muller hnen aṭanga a ball hmuh chu minute 30-naah a khung. Minute 44-naah Choupo-Moting ball fing chu Leroy Sane-a'n a khung leh bawk.

Second half-ah pawh Bayern bawk an chungnung a, minute 71-naah Cancelo aiah Alphonso Davies a rawn lut. Canadian wing back Davies hian minute 83-naah Joshua Kimmich cross chu a tauh lut.

Musiala ball thiam vangin Mainz midfielder Alexander Hack-a'n yellow card vawi hnihna a hmu a, minute 86-naah hnawhchhuah a ni. Bayern-in goal dang an khung belh tawh lo a, 4-0 in an chak.

Bayern ṭha zawk

Bayern-in theihna sang tak an nei a, kuminah erawh an theihna angin an khel chhuak thei lo. Cancelo awm hnuah an ṭha sawt a, goal li ngawta an chak avangin team boruak pawh a ṭha sawt ang.

Kum 28 mi Cancelo hi Manchester City-in season liam ta pahniha Premier League nomawi an chawi ṭumin player pawimawh a ni a, Pep Guardiola-a'n tun ṭuma a chhuahtir pawh hian mak tih a hlawh hle.

Pep-a'n Erling Haaland a chet ṭhat theih nan an khelh dan a siksawi hret a, Cancelo hian a tuar phah. World Cup zawh hnuah Cancelo hi City tan a pawimawh tawh lo a, Eithad Stadium-ah a let kher a rinawm lo. Bayern hian an duh a nih chuan Cancelo hi pound maktaduai 61.5-in an la nghet thei ang.

Bayern hian February 5, Pathianni zanah Wolsburg an tlawh dawn a, kumin bikah Bundesliga-ah chak hmel an la hmuh loh avangin Wolves nena an inkhel tur hi a pawimawh khawp ang.