East Bengal khelmualah Kerala Blasters

Indian Super League-ah zanin dar 7:30 hian East Bengal chuan Kerala Blasters an mikhual dawn a, Blasters boss Ivan Vukomanovic chuan a hma zawng aia an inpeih lehzual a pawimawh thu a sawi.

Serbian coach chuan, "Season hmasa khan league round-ah match kua hnehna kan chang a, tunah chuan khati zat match kha kan chak der tawh. Match nga khelh tur a la awm a, kan intih chak lehzual a ngai.

"Kan inlungrual tlat a, tun hma zawng aia kan inpeih lehzual a ngai a ni," a ti - Blasters hi match riat zet a zawna an tlawm loh hnuah Mumbai City (4-0) leh FC Goa (3-1) lakah an tlawm a, mahse, kar hmasa khan NorthEast United chu 2-0 a hnehin, an insiamṭha leh tawh.

Blasters hian thlasik transfer-ah player thar an lalut bawk a, tun hnai khan Bengaluru FC aṭangin Danish Farooq an lalut a, a man zat tarlang lo mah se cheng nuai 25 an inseng nia sawi a ni.

Kum 26 mi Farooq hi India tan vawi hnih a inlan tawh a, Bengaluru tan match 27-ah goal li khungin, assist vawi hnih a nei. Hetihlai hian midfielder Givson Singh chuan Chennaiyin FC chu season tawp thleng loan-a khel turin a zawm thung.

Blasters hian Mizo player an nei lo a, East Bengal-ah hian defender Jerry Lalrinzuala leh Lalchungnunga te an awm thung.