Blazers chakna Damian Lillard

Damian Lillard-a point 42 neih hmangin Portland Trail Blazers chuan Memphis Grizzlies 122-112 in an hneh a, an mach hnuhnung pahnihah Lillard hi che ṭha ve ve in, a team a chakpui a ni.

Lillard hian assist vawi 10 a neih bakah rebound ṭum riat a la bawk, basketball a khelh hun chhung hian match 49 zetah point 40 a nei tling ta a, basketball inelna sang berah hian sulhnu ṭha a hnutchhiah mek zel.

NBA huangah hian point 40 neih tlin hnem lamah 19-na dinhmun a luah a, player ropui chawl ta Shaquille O'Neal a nih rual chiah, tunlai a khelh dan en chuan tun season chhung ngeiin a khum hman a rinawm.

Inkhel dangah Boston Celtics chuan Brooklyn Nets lakah 139-96 zetin hnehna an chang. Nets hian hliam vangin an thiampuipa Kevin Durant a chhawr thei lo, ani tel lo chuang thil a harsa - team pahnih intawn hnuhnung 10-ah Boston an chak vek.

Eastern Conference hmahruaitu Celtics tan Jayson Tatum-a'n point 31 a nei a, point 26 neitu Jaylen Brown a langsar bawk. Table lamah chuan Nets hian Boston hi a elphak ve tho a, an pahnih intawnnaah erawh an ngam lo hle.